Самарқанд вилояти Пахтачи туманида электромонтёр симёғочдан йиқилиб вафот этди. Бу ҳақда Бош прокуратура матбуот котиби Ҳаёт Шамсутдинов “Дарё”га маълум қилди.
Воқеа 16 февраль куни соат тахминан 18:00 ларда юз берган. Пахтачи тумани Электр тармоқлари корхонасида электромонтёр бўлиб ишловчи 1981 йилда туғилган фуқаро Б.С. “Тадбиркор” МФЙ ҳудудида симёғочга чиқиб, электр энергиясида вужудга келган носозликларни бартараф этаётганида шамол сабабли симёғоч билан бирга йиқилиб, вафот этган.
Ушбу куннинг ўзида туман электр таъминоти томонидан ходимлар билан ўтказилган хавфсизлик қоидаларига риоя қилиш бўйича юритилган ҳужжатлар тегишли тартибда олинган.
17 февраль куни марҳумнинг жасади суд-тиббий экспертизасидан ўтказилган. Ҳозирда терговга қадар текширув ҳаракатлари олиб борилмоқда.
“Ўзгидромет” хабарида 16 февраль куни Самарқанд вилоятида баъзи жойларда шамол тезлиги 17-22 метр/секундгача, айрим жойларда 25-28 метр/секундгача кучайиши мумкинлигини қайд этилганди.
Шу йилнинг январида Жиззах вилоятининг Бахмал туманида электр таъминоти корхонаси ходими ток уришидан вафот этганди.
Изоҳ (0)