“Қимматбаҳо машиналар бор эди, ҳолат видеода айтилганидек ваҳимали эмас”. Таshkent Index масъули воқеа ҳақида гапириб берди

Ижтимоий тармоқларда Тошкент шаҳрининг Янгиҳаёт туманида жойлашган Таshkent Index автомобиль бозоридаги соябоннинг қулаб тушиши оқибатида қимматбаҳо автомобилларга зарар етгани кўринган видеолар тарқалди. “Дарё” мухбири воқеа тафсилотларини ўрганиш мақсадида автомобиль бозорига борди. 

Журналист билан суҳбатда бўлган масъул — Таshkent Index автомобиль бозорининг реклама департаменти раҳбари Сарвар Авазовнинг айтишича, қулаб тушган енгил конструкцияли соябонларнинг қурилганига 6 ой бўлган. 

16 февраль куни об-ҳавонинг кескин ёмонлашуви ва қор ёғиши оқибатида бозор ҳудудидаги соябонларнинг 50 метрлик қисми қулаб тушди. Шу пайтда бу соябонлар тагида 35 та машина бўлган. Автомобилларнинг 6 тасига шикаст етган. Баъзи автомобилларнинг багаж ёки том қисмига, баъзиларининг капотига зарар етган. Автомобиль эгалари билан гаплашиб, етказилган зарарни 100 фоиз қоплаш бўйича келишиб олдик, — дейди Сарвар Авазов. 

Масъулнинг билдиришича, ҳолат ҳуқуқни муҳофаза қилувчи орган вакиллари томонидан ҳам ўрганилган. 

Биз тадбиркорларни қўллаб-қувватлаймиз. Қанақадир муаммо келиб чиқса, биргаликда ечим қиламиз, — дейди у. 

Сарвар Авазовнинг маълумот беришича, қулаб тушган соябонларнинг ўрнатилганига олти ойдан ошган. 

Ўтган вақт давомида қор ва ёмғир ёққан бўлса-да, бундай муаммога дуч келмагандик. Келажакда яна шунақа ҳолат такрорланмаслиги учун қўшимча чоралар ўйлаб топамиз. Бу такрорланмайди деган умиддамиз, — дейди бозор раҳбарияти вакили. 

Суҳбатдош қулаб тушган соябон остида ҳақиқатдан ҳам қимматбаҳо автомобиллар бўлганини тасдиқлади. Ҳолат Telegram каналларида кўрсатилганидек ваҳимали эмаслигини, муаммо бартараф қилинганини айтди. 

Фуқароларда нотўғри фикр уйғонмаслиги учун видео тарқатувчилар холис ахборот тарқатишларини сўраб қолардик. Кўриб турганингиздек, ҳолат видеоларда айтилганидек ваҳимали бўлгани йўқ. Муаммо бартараф этилди, — дейди Сарвар Авазов. 

“Дарё” журналисти билан камера ва микрофонларсиз гаплашган тадбиркорлардан бирининг айтишича, мазкур воқеа сабаб унга тегишли автомобилларнинг 11 тасига жиддий зарар етган. 

Бу автомобилларимизни шунчаки таъмирлаш билан иш битмайди. Сабаби менга тегишли 11 та автомобилнинг барчаси қимматбаҳо. Энг арзони 35 минг доллар туради. Янги машиналарга бўёқ тегса, бу унинг айби бўлади. Бундай қимматбаҳо автомобиль олишни истаган харидор биздан бу машиналарни 2-3 минг доллар арзонга ҳам олишни истамайди. Боиси, уларда пул кўп. Улар 2-3 минг қимматига бўлса-да, зарар етмаган машина минишни истайди, — дейди тадбиркор. 

Тадбиркорнинг билдиришича, бозор раҳбарияти зарарни қоплаш ҳақида ростдан ҳам ваъда берган. 

Зарар қопланишидан умидвормиз. Кутиб турибмиз. Шу сабаб ҳозирча ваҳима қилмаяпмиз, — дейди у. 

“Дарё” воқеалар ривожини кузатишда давом этади.