Фарғона шаҳрида майнинг крипто-активлари қурилмаларини ноқонуний ўрнатган хонадон аниқланди, деб хабар беради Бош прокуратура ҳузуридаги департамент.
Маълум қилинишича, департаментнинг Фарғона шаҳар бўлими, вилоят прокуратураси, ИИБ Киберхавфсизлик бўлими ходимлари ҳамкорлигида тезкор тадбир ўтказилган. Тадбирда “Ёшлар” МФЙ ҳудудидаги хонадонда яшовчи Ф.И. ўз уйида 36 тўпламдаги майнинг крипто-актив қурилмаларини тижорат мақсадида умумий фойдаланишдаги электр тармоғига ўзбошимчалик билан улаб, жами 208,2 миллион сўмлик электр энергиясини ўғирлагани аниқланган.
Мазкур ҳолат юзасидан Жиноят кодексининг 169-моддаси (ўғрилик) билан жиноят иши қўзғатилиб, тергов ҳаракатлари ўтказилмоқда.
Аввалроқ пойтахтда электр энергиясига ноқонуний тарзда уланиб, 1,5 миллиард сўмлик зарар етказган майнинг ферма аниқлангани тўғрисида хабар берилганди. Шунингдек, Жиззахда иккита майнинг ферма давлатга салкам ярим миллиард сўм зарар етказгани маълум бўлган эди.
Изоҳ (0)