“Юз йилда бир туғилармиш, эл дардини айтолган”. Ўзбек шоу-бизнеси вакиллари Шерали Жўраевни хотирламоқда

Ўзбекистон халқ артисти Шерали Жўраев 4 сентябрь куни 77 ёшда ҳаётдан кўз юмди. Шерали Жўраев 50 йилдан зиёд ижоди давомида “Ўзбегим”, “Соҳибқирон”, “Эгаси бор юрт”, “Карвон”, “Сарбон”, “Инсон қасидаси” каби 600 га яқин қўшиқ яратган. Унинг “Биринчи муҳаббатим”, “Ёшлигимиз”, “Ой юзингга”, “Ошиқлар сардори”, “Дўст бўлсанг, ёнимда тур” каби ашулалари халқ қўшиқларига айланиб кетган.

Хонанда мумтоз шоирлар ғазалларини куйга солиб, ўзбек халқи меросини ёш авлодга ва жаҳонга танитишга улкан ҳисса қўшган. Шерали Жўраев 1981 йилда “Ўзбекистонда хизмат кўрсатган артист”, 1987 йилда “Ўзбекистон халқ артисти” фахрий унвонлари, 2018 йилда “Фидокорона хизматлари учун” орденига сазовор бўлган. 2022 йилда эса “Эл-юрт ҳурмати” ордени билан мукофотланган.

Бир гуруҳ санъаткорлар ижтимоий тармоқлада Шерали Жўраев билан турли йилларда тушган суратларини эълон қилиб, марҳум санъаткор хотирасини ёд этмоқда.

Ўзбекистон маданият вазири Шерали Жўраев нафақат Ўзбекистонда, балки минтақада ҳам энг забардаст санъаткор сифатида эътироф этилганини таъкидлаб, марҳумнинг яқинларига таъзия билдирди. 

“Санъатимиз устуни сифатида доим юрагимизда қоладилар”, — деб ёзди Фарҳод Саидов. 

Таниқли журналист ва телебошловчи Муҳаббат Ҳамроева ҳам эл ардоқлаган ҳофиз ҳақидаги хотираларини ёзиб қолдирди. “Ҳар гал шу инсон ҳақида қандай дастур тайёрласам ҳам, катта хазина топиб олган инсондек астойдил тайёрлардим”, — деб ёзади бошловчи. 

“Ҳаётда тўғри йўлимни топишимда кўплаб маслаҳатларини берганлар, оилавий тадбирларимиз уларсиз ўтмас, Мирза акамга бўлган меҳрлари ҳам бошқача эди”, — дея хотираларини бўлишмоқда Тожибар Азизова. 

Машҳур Муҳаммаднинг фикрича, Шерали Жўраев “хонандаман деган ҳар бир инсоннинг ижодига бевосита ва билвосита таъсир ўтказа олган”.  

“Эсимни танибманки уйимизда Шерали Жўраевнинг қўшиқлари қўйиларди, дадам “Биринчи муҳаббатим”ни биз билан бирга куйларди”, — деб ёзди актриса Дилнавоз Исматуллаева.

“Устун қулади”, — деб ёзди Даврон Кабулов марҳумнинг оила аъзоларига таъзия билдириб. 

“Шерали Жўраев миллат қўшиқчиси эди. Ўзбекистоннинг ҳар бир қишлоғида Шерали Жўраев қўшиқларини ижро этадиган ҳофиз бор эди. Устоз ҳаётлари давомида катта қўшиқчилик мактабини яратиб кетдилар”, — дейди Маҳмуд Намозов. 

Режиссёр Рустам Саъдиев марҳум ҳофизни “Ўзбек санъатининг ибратли асл намунаси” дея эътироф этди. 

Яқинда онасидан айрилган хонанда Озода Нурсаидова ҳам марҳумнинг яқинларига таъзия билдирди. 

Актриса Интизор Тожибоева ҳам Шерали Жўраевнинг оила аъзоларига ҳамдардлик билдирди.