Қирғизистонда ҳам яқин кунларда ҳаво ҳарорати кескин совиб кетиши кутилмоқда.
Прогнозларга қараганда, Қирғизистонга қаттиқ совуқлар яқинлашмоқда. Бир неча кундан кейин Бишкекда ҳаво ҳарорати 11-13 даража совуқ бўлиши айтилмоқда.
17 февраль куни ҳаво жуда совуқ бўлиши қайд этилган. Мамлакатнинг аксарият ҳудудларида қор ёғиши, айрим жойларда кучли ёғингарчилик бўлиши мумкин. Чуй вилоятида 18 февраль куни кечаси 14 даража совуқ, кундузи 2-7 даража совуқ бўлиши кутилмоқда.
Бундан аввал Қозоғистонда ҳарорат 32 даражагача совиб кетиши айтилганди.
13—14 февраль кунлари Қозоғистоннинг аксарият ҳудудларида об-ҳаво кескин совиб кетиши кутилмоқда. Мутахассислар ёмғир ва қор шаклида ёғингарчилик бўлиши, шимолий ҳудудларда кучли қор ёғиши, ерлар музлашини прогноз қилган.
Шунингдек, Қозоғистон ғарбида ҳаво ҳарорати 5 даража совуқ ва 5 даража илиққача; шимолий, марказий шарқий вилоятларда 5 даража совуқ ва 2 даража илиққача кўтарилиши мумкин. Февраль ойининг ўрталарига келиб циклон Қозоғистон ҳудудини тарк этади, унинг ўрнини қорсиз Арктика антициклони эгаллайди, у республиканинг шимолий ярмига совуқни қайтаради.
Мамлакатнинг ғарбий, шимоли-ғарбий ва шимолида 15 февралга қадар ҳаво ҳарорати кечаси 22-32 даража, кундузи 15-27 даража совуққача пасайиши кутилмоқда. Республиканинг қолган ҳудудларида эса ҳарорат билан боғлиқ ўзгаришлар бўлмайди.
Изоҳ (0)