Қашқадарё вилояти ҳокими Муроджон Азимов ярим тунда светофорнинг тақиқловчи чироғига амал қилмаган ҳайдовчига шахсан ўзининг ташаббуси билан чора кўрилганини маълум қилди. Бу ҳақда «Дарё» мухбири хабар берди.
Қайд этилишича, вилоят раҳбари ҳайдовчининг қоидабузарлиги ҳақида Халқ депутатларининг вилоят кенгашининг навбатдаги сессиясида 2021 йилги ижтимоий-иқтисодий ривожланиш якунлари ҳамда 2022 йил учун белгиланган вазифалар юзасидан аҳолига мурожаатномасида айтиб ўтган.
«Ярим тунда ишдан қайтаётганимда бир воқеага дуч келдим. Давлат рақами 701 бўлган машинада бир бойнинг боласи, кимлигини айтишим шартмас, кечаси тўрт маротаба светофорнинг тақиқловчи чироғига амал қилмай ҳаракатланди. Мен вилоят Ички ишлар бошқармаси бошлиғига қўнғироқ қилиб, шу автомобиль эгасини топишини сўрадим. Билсак, у ота-онаси билан тортишиб қолган экан. Тортишиб қолса, машинадан аламини олиши керакми? У қоидабузарлиги билан нафақат ўзининг, атрофдагиларнинг ҳам ҳаётига хавф соляпти-ку. Шунинг учун биз бу ҳайдовчига чора кўрилишига эришдик», — деган вилоят ҳокими.
Муроджон Азимов Қашқадарёда қонун устуворлиги, жазо муқаррарлиги таъминланишини таъкидлаган.
«Мен жамоатчиликка, депутатларимизга мурожаат қилиб айтмоқчиманки, эндиликда вилоятда қонун устуворлиги, жазо муқаррарлиги таъминланади», — дея қайд этган вилоят раҳбари.
Мавзуга доир:
- Шавкат Мирзиёев: «Яқинда Зоминда ёнғин бўлди, бир бойваччанинг ўғли шу ишни қилибди»
- Олмалиқ шаҳри ҳокимининг ўғли Тошкентда катта тезликда машина ҳайдади. Ҳоким ўғлининг ишига изоҳ берди
- Тошкентда соатига 150 км тезликда машина ҳайдаган Олмалиқ ҳокимининг ўғли ўртоқлари билан 56 ёшли эркак ва унинг ўғлини калтаклагани маълум бўлди (видео)
Изоҳ (0)