Ўзбекистон ва Озарбайжон ҳукуматлари ўртасида фуқароларнинг визасиз сафар қилишларига оид ҳужжат кучга кирди, деб хабар беради ИИВ ахборот хизмати.
Қайд этилишича, 1997 йил 18 июнда имзоланган Ўзбекистон ҳукумати билан Озарбайжон ҳукумати ўртасида Ўзбекистон ва Озарбайжон фуқароларининг визасиз сафар қилишлари тўғрисидаги битимга қўшимчалар ҳамда ўзгартириш киритиш тўғрисида баённома кучга кирди.
Мазкур баённома 2023 йил 22 августда Озарбайжоннинг Боку шаҳрида имзоланиб, 15 январда кучга кирди.
Ушбу баённома икки республика фуқаролари учун қулай шарт-шароитлар яратишга қаратилган бўлиб, Ўзбекистон ва Озарбайжон ҳудудига кириш/чиқиш, транзит ўтиш ва 15 кун муддатга ўзлари бўлиб турган давлатнинг ваколатли органларида рўйхатдан ўтиш мажбуриятидан озод этилиши белгиланди.
Эрон ҳукумати 4 февралдан бошлаб Ўзбекистондан келган сайёҳлар учун визаларни бир томонлама бекор қилганди. Шунингдек, Ўзбекистон ва Бирлашган Араб Амирликлари ҳукуматлари ўртасида кириш виза талабларидан ўзаро озод этиш тўғрисидаги ҳамкорлик протоколи 2024 йил 16 февралдан кучга киради.
Изоҳ (0)