O‘zbekiston va Ozarbayjon hukumatlari o‘rtasida fuqarolarning vizasiz safar qilishlariga oid hujjat kuchga kirdi, deb xabar beradi IIV axborot xizmati.
Qayd etilishicha, 1997-yil 18-iyunda imzolangan O‘zbekiston hukumati bilan Ozarbayjon hukumati o‘rtasida O‘zbekiston va Ozarbayjon fuqarolarining vizasiz safar qilishlari to‘g‘risidagi bitimga qo‘shimchalar hamda o‘zgartirish kiritish to‘g‘risida bayonnoma kuchga kirdi.
Mazkur bayonnoma 2023-yil 22-avgustda Ozarbayjonning Boku shahrida imzolanib, 15-yanvarda kuchga kirdi.
Ushbu bayonnoma ikki respublika fuqarolari uchun qulay shart-sharoitlar yaratishga qaratilgan bo‘lib, O‘zbekiston va Ozarbayjon hududiga kirish/chiqish, tranzit o‘tish va 15 kun muddatga o‘zlari bo‘lib turgan davlatning vakolatli organlarida ro‘yxatdan o‘tish majburiyatidan ozod etilishi belgilandi.
Eron hukumati 4-fevraldan boshlab O‘zbekistondan kelgan sayyohlar uchun vizalarni bir tomonlama bekor qilgandi. Shuningdek, O‘zbekiston va Birlashgan Arab Amirliklari hukumatlari o‘rtasida kirish viza talablaridan o‘zaro ozod etish to‘g‘risidagi hamkorlik protokoli 2024-yil 16-fevraldan kuchga kiradi.
Izoh (0)