Польша Миллий хотира институти Иккинчи жаҳон уруши даврига оид иккита оммавий қабрни топди.
Ташкилот раҳбари Карол Навроцкининг матбуот анжуманида айтишича, қабрлар Варшава шимолидаги собиқ «Дзиялдово» концлагери («Золдау» ҳам деб аталади) яқинидаги ўрмонда топилган.
Мутахассисларнинг айтишича, оммавий қабрларда камида саккиз минг кишининг жасади бор. Мутахассислар жами 17 тоннадан ортиқ хок топилганига қараб шундай хулосага келмоқда.
Институт ходимлари яқин ўрмонларда яна бошқа оммавий қабрларни топиш мумкинлигига ишонмоқда.
«Дзиялдово» концлагери 1939 йилда қурилган ва ундан бутун нацистлар истилоси даврида фойдаланилган. Тахминларга кўра, у ерда 30 минггача одам ҳалок бўлган. 2019 йилда Миллий хотира институти концлагерда ҳалок бўлганларнинг аниқ сонини аниқлаш мақсадида тергов бошлади. 1944 йилнинг баҳорида нацистлар қирғин изларини яшириш учун марҳумларнинг қолдиқларини қазиб олиб, сўнг ёқиб юборгани учун қабрларни қидириш мураккаблашган.