Afg‘onistonning Xost viloyatida 100 ga yaqin jasaddan iborat ommaviy qabr topildi. Bu haqda Tasnim news xabar berdi.
“Tolibon”ning Xost viloyatidagi mahalliy rasmiylari ushbu viloyat markazida ommaviy qabr topilganini eʼlon qildi. Mazkur ommaviy qabrdan kamida 100 nafar jasadning suyaklari olib chiqarilgan. Topilma Xost viloyati markazidagi Sarbani hududida kichik to‘g‘on qurilishi vaqtida aniqlangan.
Rasmiylarga ko‘ra, bu joyda dafn etilgan odamlar 1979-yilda o‘ldirilgan, keyin esa ommaviy qabrga ko‘milgan. Fransiya axborot agentligi “Tolibon” rasmiylariga tayanib, ommaviy qabr “Afg‘onistonda Sovet Ittifoqi tomonidan qo‘llab-quvvatlangan hukumat davriga tegishli” deb xabar berdi.
Dastlabki xulosalar shuni ko‘rsatadiki, ommaviy qabr 1979-yildagi “Afg‘oniston Xalq Demokratik partiyasining davlat to‘ntarishi”dan taxminan bir yil o‘tib, ushbu partiyaning 100 ga yaqin muxoliflarini dafn etish uchun qazilgan.
Manbalarga ko‘ra, bu odamlar o‘z kiyimlari bilan dafn etilgan va ular orasida ayollar va bolalar kiyimlari ham borligi aytilmoqda. Dastlabki ma’lumotlarga ko‘ra, ular otib o‘ldirilgan.
Izoh (0)