Финляндияда собиқ бош вазир, ўнг марказчи Миллий коалиция партиясидан номзод, консерватор Александр Стубб мамлакатнинг янги президенти этиб сайланди. Бу ҳақда BBC хабар берди.
11 февраль куни Финляндияда бўлиб ўтган президентлик сайловларининг иккинчи босқичида Стубб ғалаба қозонди. У 51,6 фоиз овоз олди, рақиби собиқ ташқи ишлар вазири Пекка Хаависто эса 48,4 фоиз тўплади. У Стуббни Финляндиянинг 13-президенти сифатида табриклади:
“Мен Финляндия республика учун яхши президентни қабул қилганига ишонаман. Александр Стубб бу иш учун тажрибали, малакали шахс”.
Финляндияда президентлик сайловларининг биринчи босқичи 28 январь куни бўлиб ўтди, унда мамлакатнинг собиқ бош вазири 27,2 фоиз, собиқ ташқи ишлар вазири Ҳаависто 25,8 фоиз овоз олган. Финляндиянинг янги президенти Александр Стубб амалдаги президент Саули Ниинисто ўрнига расман 1 мартдан ўз лавозимига киришади.
Изоҳ (0)