Қатарда жосусликда айбланиб ўлимга ҳукм қилинган Ҳиндистон фуқаролари озод қилинди. Бу ҳақда CNN хабар берди.
Ҳиндистон ҳукумати Қатарда ҳибсга олинган Dahra Global компаниясида ишлайдиган саккиз нафар фуқаросининг озод этилишини олқишлади. Уларнинг етти нафари Ҳиндистонга қайтган. “Жосуслар”нинг Қатардаги ҳукми сир сақланмоқда ва улар қандай жиноят содир этгани, нимада айблангани ҳалигача номаълум.
Қатар саккиз нафар ҳинд фуқаросининг ҳибсга олингани, судлангани ва кейинчалик озод этилгани ҳақида очиқчасига эълон қилмаган. CNN Қатар расмийларига изоҳ сўраб мурожаат қилганида, улар Ҳиндистон фуқаролари жосусликда айбланганини айтган эди.
Ҳиндистон Ташқи ишлар вазирлиги ҳам ушбу иш бўйича суд жараёнининг махфийлигини баҳона қилиб, айбловлар тафсилотларини ошкор қилмаган.
2023 йил октябрь ойида Қатар суди саккиз фуқарони ўлимга ҳукм қилди. Ҳиндистон барча эркакларнинг оилалари билан алоқада экани ва Қатар ҳукумати билан ҳукмни муҳокама қилаётганини билдирди. Декабрь ойида вазирлик жазолар енгиллаштирилгани ва тез орада батафсил қарор чиқарилишини айтган эди.
Изоҳ (0)