11-22 март кунлари АҚШнинг Нью-Йорк шаҳрида БМТ Аёллар ҳолати бўйича комиссиянинг (CSW) 68-сессияси бўлиб ўтади ва ушбу тадбирнинг асосий эътибори гендер тенглигига эришишни тезлаштириш ва камбағалликни бартараф этиш орқали хотин-қизларнинг ҳуқуқ ва имкониятларини кенгайтиришга қаратилади. Бу ҳақда Сенат матбуот хизмати хабар берди.
Бугун, 12 февраль куни эса Тошкентда Олий Мажлис Сенати БМТ Аёллар ташкилоти билан ҳамкорликда “Гендер тенгликка эришишни тезлаштириш ва камбағалликни бартараф этиш, институтлар ва гендерга оид молиялаштиришни мустаҳкамлаш орқали барча хотин-қизларнинг ҳуқуқ ва имкониятларини кенгайтириш” мавзусида тадбир ўтказилди. Унда Танзила Норбоева тадбир иштирокчиларига видеомурожаат йўллаб, бугунги кунда Марказий Осиё ва Озарбайжон давлатлари хотин-қизларнинг ҳуқуқ, эркинликлари ва манфаатларини ҳимоя қилиш, зўравонлик ва камситишнинг олдини олиш, шунингдек, қарорлар қабул қилиш жараёнларида иштирокини таъминлаш борасида улкан ютуқларга эришилганини таъкидлаган.
“Мамлакатларимизда гендер тенгликни таъминлаш соҳасида амалга оширилаётган ислоҳот ва ўзгаришлар натижасида зарур тажриба ва амалиёт тўпланди, хотин-қизларнинг ижтимоий, сиёсий ва иқтисодий ҳаётда тўлиқ ва тенг ҳуқуқли иштирок этиши учун қулай шароитлар яратилмоқда. Биз давлатларнинг барча жабҳаларида аёллар ва эркаклар учун тенг шароитларни назарда тутувчи Пекин декларацияси ва Ҳаракатлар платформаси мақсадларига эришиш сари босқичма-босқич бормоқдамиз. Шу мақсадда Ўзбекистон хотин-қизларни ижтимоий ҳимоя қилиш бўйича тадбирларни ҳар томонлама қўллаб-қувватлаш борасидаги саъй-ҳаракатларни давом эттириш тарафдори”, – деган у.
Маслаҳатлашувларда минтақавий органлар – БМТнинг Марказий Осиё учун превентив дипломатия бўйича минтақавий маркази, Марказий Осиё мамлакатлари аёллар мулоқоти ва бошқалар иштирок этган. Маслаҳатлашувлар давомида институтлар ва гендерга оид молиялаштиришни мустаҳкамлаш аспектларини инобатга олган ҳолда камбағаллик муаммоларини ҳал қилишда тармоқлараро ҳамкорликни мужассамлаштириш ҳамда гендер тенгликни ва хотин-қизларнинг ҳуқуқ ва имкониятларини кенгайтиришни таъминлаш учун молиялаштиришдаги узилишларни бартараф этиш: гендер тенглик сиёсати ва бюджетларига таъсир кўрсатиш учун салоҳият ва маконини кенгайтириш каби мавзуларда муҳокамалар ташкил этилган.
Шунингдек, ҳақ тўланмайдиган парвариш ва уй ишларининг номутаносиб юки билан курашиш: хизмат кўрсатиш фаолиятига ўтиш ҳамда ижтимоий ҳимоя хизматлари ва тизимлари мавзуларига эътибор қаратилган. Маслаҳатлашувлар якуни бўйича Марказий Осиё минтақаси (Ўзбекистон, Тожикистон, Қозоғистон, Қирғизистон, Туркманистон) ва Озарбайжоннинг CSW’нинг 68-сессиясига ҳисса қўшадиган ва ундаги иштироки учун асос бўладиган кенг қамровли мурожаатлар, илғор тажриба ва аниқ тавсиялар тўпламини ўз ичига олган ҳужжат қабул қилинади.
Изоҳ (0)