Тошкент вилоятида тунда машиналар баллонини ечиб кетаётган гуруҳ ушланди (видео)

Тошкент вилоятида тунда машиналар баллонини ечиб кетаётган гуруҳ ушланди. Бу ҳақда вилоят ИИББ ахборот хизмати хабар берди. 

Унга кўра, 21 январь куни Янгийўл шаҳар ИИБга келиб тушган хабар асосида ИИБ ходимлари томонидан ўтказилган тезкор-қидирув тадбирлари натижасида тунги вақтда автомашина шиналарини яширин равишда ечиб, машиналарни ғиштларга ўтқазиб, шиналарни пуллаётган жиноий гуруҳ қўлга олинди.

Маълум бўлишича, Янгийўл шаҳрида яшовчи, 2001 йилда туғилган Б.И. тенгдоши Ж.А. ва шериги 1997 йилда туғилган Н.Н.лар билан биргаликда ўзганинг мол-мулкини яширин равишда талон-торож қилиб, Янгийўл шаҳри, Янгийўл ва Қуйи Чирчиқ туманларида ўнга яқин Cobalt’ларнинг шиналарини тунда яширин равишда ечиб олиб, сотиб юборган ва пулларини шахсий эҳтиёжлари учун ишлатган.

Ўтказилган тезкор-қидирув тадбирлари давомида юқорида қайд этилган шахслар процессуал тартибда қўлга олиниб, ушланган шахсларга нисбатан Жиноят кодексининг 169-моддаси 3-қисми “б” банди (ўғрилик) билан жиноят иши қўзғатилди. Тергов ҳаракатлари олиб борилмоқда.