Қашқадарё вилоятида 600 дан зиёд фуқарони қарийб 6,5 миллиард сўмга чув туширган шериклар қидирилмоқда. Бу ҳақда ИИВ ахборот хизмати хабар берди.
Келтирилишича, Фарғонанинг Данғара туманида 1993 йилда туғилган С.Н. ўтган йилнинг 19 сентябрь куни Қарши шаҳрида “Қарши кредит” МЧЖ очган. Унга Тошкент шаҳрида 1999 йилда туғилган С.Ж.ни иш бошқарувчи этиб тайинлаган. Бироқ С.Ж. савдо-сотиқ, реклама ишлари билан шуғулланиши керак бўлса-да, кўплаб фуқароларнинг пулларини кредит бериш орқали жалб этишга эришган.
Жиноий шериклар биргаликда жуда кўп маблағларни ўзлаштириш мақсадида фуқароларга дастлабки тўлов эвазига кредитга пул беришга келишиб, олдиндан 20 фоизини олиб қолган, ваъда қилинган пулларни мижозларга нақд пул шаклида беришини айтган. Шу орқали улар 606 нафар фуқародан 6 миллиард 462 миллион 550 минг сўм пулларни қабул қилиб олган.
Ҳолат юзасидан 2023 йил 4 октябрь куни Қарши шаҳар ИИО ФМБ томонидан Жиноят кодексининг тегишли моддалари билан жиноят иши қўзғатилган. Гумонланувчилар номаълум томонга яширингани сабабли уларга қидирув эълон қилинган. Улар ҳақида хабар берганларнинг шахси сир сақланиши кафолатланади.
Изоҳ (0)