Сирдарёда йўл ҳаракати қоидабузарликларини қайд этувчи камералар сотиб олишга 3 млрд сўм ажратилади

Сирдарёда йўл ҳаракати қоидалари бузилишини қайд этувчи махсус автоматлаштирилган фото ва видео дастурий-техник воситаларини харид қилиш билан боғлиқ харажатларга 3 миллиард сўм ажратилади.

Бу ҳақда “Вилоят маҳаллий бюджетининг 2024 йилда шаклланган қўшимча манбалар ҳисобидан маблағ ажратиш тўғрисида”ги халқ депутатлари Сирдарё вилояти кенгаши қарори лойиҳасида келтирилган.

Ҳужжатда қайд этилишича, бу президентнинг 2022 йил 12 июлдаги қарори ижросини таъминлаш мақсадида Шавкат Мирзиёев томонидан 2022 йил 3 май куни ўтказилган видеоселектор йиғилишида берилган топшириқлар бўйича тасдиқланган йиғилиш баёнига асосан амалга оширилади.

Белгиланган топшириқлар ижросини таъминлаш учун харажатлар вилоят маҳаллий бюджетининг 2024 йил бошида шаклланган эркин қолдиқ маблағлари ҳисобидан қопланиши режалаштирилган.