Хитой Тайвандаги президентлик сайловлари ғолибини Ғарб давлатлари табриклагани сабабли кескин норозилигини билдирди. Бу ҳақда Deutsche Welle хабар берди.
Хитой Ташқи ишлар вазирлиги ва мамлакатнинг хориждаги элчихоналари 14 январь куни Тайвандаги президентлик сайловларида ғалаба қозонган Уилям Лайни қўллаб-қувватлашдан огоҳлантирди. АҚШ ва Буюк Британия Хитойнинг бевосита танқид қилиш объектига айланди. Хитой уларнинг Уилям Лай ғалабасига муносабатини “Тайваннинг мустақилликка эришиш интилишлари учун нотўғри сигнал” деб атади.
“Хитой Қўшма Штатлар ва Тайван ўртасидаги расмий мулоқотнинг ҳар қандай шаклига ҳар доим сўзсиз қарши бўлиб келган ва АҚШнинг Тайван ишларига ҳар қандай шакл ёки контекстдаги аралашувини қатъиян рад этади”, — деди Хитой ТИВ.
Тайванда бўлиб ўтган сайлов ғолибини Германия, Япония, Чехия ва бошқа бир қатор давлатлар ҳукуматлари ҳам табриклади.
“Тайван Хитойнинг ажралмас қисмидир ва алоҳида давлатга айланмайди, у Хитой таркибига қайтади”, — деди Хитой ташқи ишлар вазири Ван И.
Шунингдек, у Тайваннинг Хитойга тегишли экани 1943 йилда Қоҳира конференцияси якунлари бўйича қабул қилинган декларация билан боғлиқлигини таъкидлади: бу ҳужжатга кўра, Япония томонидан ХХРдан тортиб олинган барча ҳудудлар Хитой томонига қайтарилиши керак эди.
Ван И ташқи ўйинчиларни Хитойнинг ички ишларига аралашишдан огоҳлантирди ва Пекин “бундай қадамларга қатъий жавоб беришини” таъкидлади.
“Тайванни мустақил давлат деб эълон қилиш режалари ўтмишда муваффақиятли бўлмаган ва ҳозир ҳам, келажакда ҳам бўлмайди”, — дипломат.
Изоҳ (0)