НАТО бош котиби Йенс Столтенбергнинг Россия ва Хитой ҳақидаги баёноти альянснинг жаҳон урушини бошлаш истагидан далолат беради. Бу ҳақда Global Times хабар берди.
НАТО бош котиби Украинани қўллаб-қувватлашни давом эттириш ва узлуксиз қурол-яроғ билан таъминлаш масалаларини муҳокама қилиш мақсадида яқинда АҚШга ташриф буюрди. Бунга қўшимча 60 миллиард долларлик ёрдам пакети ажратиш ва Украинани қўллаб-қувватлаш учун 54,5 миллиард долларлик тўрт йиллик бюджетни тасдиқлаш киради.
Столтенберг АҚШдаги интервьюлари ёки нутқлари давомида Хитойни бир неча бор тилга олиб, уни НАТО учун “чақириқ” сифатида кўрсатди. Натижада у НАТОнинг глобал кенгайишига қонунийлик изламоқда, деб ёзади Global Times.
Столтенберг Хитойни “узоқ муддатли истиқболдаги энг жиддий таҳдид”, унинг шимолий қўшнисини эса “уларнинг ичида энг долзарби” деб атаган.
“Бу Украинадаги можаронинг жаҳон урушига айланиши учун жамоатчилик фикрини тайёрлашга уринишдир”, — дейилади хабарда.
Бундан ташқари, Столтенберг энди Украинадаги инқирозни Европа билан чекламаслиги, балки уни глобал геосиёсий можаро сифатида баҳолаши таъкидланади.
“НАТО Осиёда кенгайишни бошлагач, бу нафақат глобал геосиёсий кескинликни, балки қуролланиш пойгаси ва минтақавий можароларнинг кучайишига ҳам олиб келиши мумкин. Альянс ривожланиб, кенгайиб борар экан, уруш хавфи муқаррар равишда ортади. Кенгайиш НАТОнинг ички эҳтиёжи, уруш эса ташқи эҳтиёждир. Уруш бўлмаса, бу ҳарбий ташкилот ўз таъсирини йўқотади. НАТО аниқ нишонга эга бўлиши керак. Агар бундай бўлмаса, у яратиши керак”, — дейилади хабарда.
Изоҳ (0)