Украина президенти Владимир Зеленский 4 февраль куни Запорожье вилоятининг Работино қишлоғига келди ва у ерда Украина армиясининг 65-махсус механизациялашган бригадаси билан учрашди. Бу ҳақда BBC хабар берди.
Зеленскийнинг ҳарбийлар билан мулоқоти акс этган видео ўзининг Telegram каналида эълон қилинди.
“Ҳимоячилар билан суҳбатлашдим, уларга миннатдорлик билдирдим, давлат мукофотларини топширдим. Бугун бу ерда бўлиш, жангчиларни қўллаб-қувватлаш ва уларни мукофотлаш шарафдир. Уларнинг елкасида қийин, ҳал қилувчи вазифа турибди: душманни орқага суриш ва Украинани ҳимоя қилиш”, — деди Зеленский.
2023 йил август ойи охирида Украина Мудофаа вазирлиги Работино қишлоғи украиналик ҳарбийлар томонидан тўлиқ озод қилинганини эълон қилди. Работино рус армиясининг Ореховский йўналишидаги мустаҳкамланган ҳудудларидан бири эди.
Зеленский шунингдек Запорожье вилоятидаги хавфсизлик ҳолати бўйича йиғилиш ўтказгани, ҳарбий қўмондонлик ва ҳуқуқ-тартибот идоралари раҳбарларининг ҳисоботларини тинглагани ҳақида хабар берди. Президент билан учрашувда Авдеевский йўналишидаги мудофаа масалалари, Работино ва фронтнинг бошқа тармоқларидаги вазият, муҳим инфратузилма объектлари ва Украина ҳарбий-саноат комплексини ҳимоя қилиш масалалари муҳокама қилинган.
Изоҳ (0)