Тошкент шаҳар божхона бошқармаси томонидан 339 миллион сўмлик тамаки маҳсулотларининг ноқонуний айланувига чек қўйилди. Бу ҳақда бошқарма матбуот хизмати хабар берди.
Қайд этилишича, божхона бошқармаси Контрабандага қарши курашиш бўлими ходимлари томонидан ҳуқуқни муҳофаза қилувчи бошқа органлар билан ҳамкорликда пойтахтнинг Олмазор туманида тезкор тадбир ўтказилган. Тадбир давомида Lacetti русумли автотранспорт воситаларининг хатти-ҳаракати олдиндан кузатувга олинган ва мазкур транспорт воситалари тумандаги яшаш хонадонларидан бирига келиб тўхтаган вақтида кўздан кечирилган.
Аниқланишича, транспорт воситаларида мазкур хонадонда ташкил этилган “яма”га тамаки маҳсулотлари жойлаштириш учун келган экан. Шунингдек, хонадонда муқаддам “яма” сифатида сақланиб келинган, кейинчалик сотиш учун мўлжалланган тамаки маҳсулотлари борлиги ҳам аниқланган.
Натижада ўтказилган тезкор тадбирда қиймати 339 миллион сўмлик 17 890 қути тамаки маҳсулотларининг ички ҳудудда ноқонуний айланувига чек қўйилган. Ҳозирда ҳолат юзасидан терговга қадар текширув ҳаракатлари олиб борилмоқда.
Аввалроқ Хоразмда 422 миллион сўмлик акциз маркасиз тамаки маҳсулотлари аниқлангани, Навоий ва Бухорода 600 млн сўмлик қалбаки акциз маркали алкогол маҳсулотлари савдосининг олди олингани тўғрисида хабар берилганди.
Изоҳ (0)