Ижтимоий тармоқларда Сариосиё тумани Карш қишлоғидаги мактабга борувчи йўл бўйича видеомурожаат тарқалди. Сурхондарё вилоят ҳокимлиги ушбу ҳолат юзасидан муносабат билдирди.
Маълум қилинишича, мазкур ҳолат вилоят ҳокими томонидан ташвишли қабул қилинган. Муаммо дарҳол ўрганилиб, ечими бўйича чора-тадбирлар ишлаб чиқиш кўрсатмаси берилган.
Ҳокимлик муносабатида қайд этилишича, “Карш” маҳалласи Сариосиё тумани марказидан қарийб 70 км узоқликда, тоғли ҳудудда жойлашган бўлиб, 487 нафар фуқаро 91 та хонадонда истиқомат қилади. Маҳалладаги 80 ўринли мактаб 2018 йилда қурилган ва ҳозирда барча зарур шароитлар билан таъминланган. 2022—2023 йиллар давомида маҳаллага транспорт бориши учун 11 км узунликдаги тоғли ҳудуд орқали янги йўл очилган. Маҳалланинг 5 км ички йўллари тошланиб, таъмирланган. Шунга қарамай видео кўрсатилган ички йўлда ноқонуний қурилмалар сабабли таъмирлаш ишлари бажарилмай қолиб кетган.
“Айни ҳозирги кунларда “Карш” маҳалласига борувчи йўл тўлиқ қор билан қопланганлиги сабабли транспортнинг ҳудудга бориш имконияти йўқ. Вилоят ҳокимининг кўрсатмаси билан “Карш” маҳалласидаги мактабга борувчи ички йўлни таъмирлаш бўйича туман ҳокимлиги ва мутасадди ташкилотлар томонидан чора-тадбирлар ишлаб чиқилаётган бўлиб, йўлдаги қор қоплами эригач, таъмирлаш ишлари бошланади”, – дейилади хабарда.
Амалга оширилган ишлар хусусида жамоатчиликка қўшимча ахборот берилиши айтилди.
Изоҳ (0)