Бухоро ва Сурхондарё вилоятларида йўл қурилиш ишлари муносабати билан кўп сонли дарахт ва буталар кўчирилиши мумкинлиги ҳақида хабар берилган эди. Ўзбекистон Экологик партиясининг хабар қилишича, ушбу халқаро автомобиль йўли лойиҳаси ўзгартириладиган бўлди.
Ўзбекистон Экологик партияси мавжуд ҳолатни тўла ўрганиб чиқиш учун Олий Мажлис Қонунчилик палатаси ҳамда маҳаллий кенгашлар депутатлари, олим ва мутахассиларни жалб қилган ҳолда ҳудудга борди.
Ишчи гуруҳ томонидан Ўзбекистондаги бугунги экологик ҳолат инобатга олиниб ҳамда жамоатчиликнинг ҳақли эътирозларига сабаб бўлган ушбу лойиҳани соҳа мутахассислари иштирокида ўзгартириш ва дарахтларга зарар етказмаслик бўйича мазкур автомобиль йўлини реконструкция қилаётган пудратчи ташкилот мутасаддиларига таклифлар берилди.
“Ўзбекистон экологик партияси ҳар қандай қурилиш лойиҳаларини амалга оширишда ўсимлик дунёсига зарар етказишни кескин қоралаган ҳолда жамоатчилик вакилларига ўз миннатдорчилигини билдириб, барча фуқароларимизни она табиатни асраб-авайлашдек эзгу ишларда ҳамкорликка чақириб қолади”, — дейилади партия хабарида.
27 июль куни бўлиб ўтган матбуот анжуманида экология вазири биринчи ўринбосари Обиджон Қудратов ушбу масала юзасидан фикр билдириб, лойиҳа ҳужжатлари вазирлик билан келишилмагани, рад этилганини айтганди.
Қўмита эълон қилган расмий муносабатда бош вазир ўринбосари Жамшид Хўжаев томонидан имзоланган ҳукумат комиссиясининг 2023 йил 21 июлдаги баённомасига мувофиқ, Экология, атроф-муҳитни муҳофаза қилиш ва иқлим ўзгариши вазирлигига бир ҳафта муддатда дарахтларни атроф-муҳитга зарар етказмасдан кўчириш бўйича ҳукумат комиссиясига хулоса бериш ва тегишли таклифлар киритиш топширилгани, ушбу ҳужжатда дарахтларни кесиш ҳақида бирорта ҳам сўз, шунингдек, бундай иссиқ мавсумда яшил майдонлар билан бирор-бир чора кўриш бўйича кўрсатмалар йўқлиги билдирилганди.
Бухоро вилоятидан қурилиш компанияси вакиллари вазирликка ташриф буюриб, дарахт ва буталарга зарар етказмаган ҳолда лойиҳага ўзгартиришлар киритишлари ҳақида маълумот берган.
Изоҳ (0)