Украина президенти Владимир Зеленский ҳафта охиригача Украина Қуролли кучлари бош қўмондони Валерий Залужнийни ишдан бўшатиш тўғрисидаги фармонни имзолайди. Бу ҳақда манбаларга таяниб, CNN хабар берди.
Хабарга кўра, 29 январь куни Зеленский кабинетида Залужний билан учрашув бўлиб ўтган. Унда Украина президенти бош қўмондонни ишдан бўшатиш режасини эълон қилгани айтилмоқда. Учрашувда мудофаа вазири Рустем Умеров ҳам иштирок этган.
Таъкидланишича, Украина разведкаси раҳбари Кирилл Буданов ва Украина армияси қуруқликдаги қўшинлари қўмондони Александр Сирский бош қўмондон лавозимига кўриб чиқилмоқда. The Times ва The Economist нашрларига кўра, иккаласи ҳам тайинланишдан бош тортган.
Декабрь ойида Киев Социология институти ўтказган сўров шуни кўрсатдики, Залужнийни украиналикларнинг 88 фоизи қўллаб-қувватлайди. Зеленскийнинг маъқуллаш рейтинги 62 фоизни ташкил этади. Тhе Washington Post нашрининг ёзишича, президент ўз иттифоқчилари ҳарбий ёрдамни секинлаштиргани учун бош қўмондонни ишдан бўшатиш орқали уларга таъсир ўтказмоқчи. Бундан ташқари, Залужний билан ўтказилган йиғилишда аҳолининг жанглардан чарчагани ҳам қайд этилган.
- Зеленский ва Залужний ўртасидаги можаро ҳақидаги маълумотлар бир неча ойдан бери оммавий ахборот воситаларида тарқалмоқда. Бундай хабарларнинг пайдо бўлишига биринчи сабаб бош қўмондоннинг The Economist газетасидаги мақоласи бўлиб, унда у жанг майдонидаги вазиятни боши берк кўчага кириб қолган деб баҳолаган эди. Украина президенти эса бу фикга қўшилмаган.
Изоҳ (0)