Президент Администрацияси “Ўзбекистон—2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастурига президент фармони лойиҳасини муҳокамага қўйди.
Ҳужжат лойиҳасида 1 сентябрдан бошлаб, фуқароларга пенсия ёки ногиронлик тайинлаш вақтида алоҳида мурожаат қилишларини талаб этмаган ҳолда уларни санаторийга навбатга қўйиш тартибини жорий этиш назарда тутилмоқда.
Лойиҳада ижтимоий ҳимояга муҳтож фуқароларни қўллаб-қувватлаш тизими бўйича қуйидаги ўзгаришлар кўзда тутилган:
- 2024 йил 1 сентябрдан бошлаб, пенсия тайинлашда бир вақтнинг ўзида санаторийга навбатга қўйиш ва шахсий жамғариб бориладиган пенсия ҳисобварағидаги пулни олиш билан боғлиқ ҳаракатларни проактив тарзда амалга ошириш тартиби жорий этилади;
- 2024 йил 1 сентябрдан бошлаб, ногиронликни тайинлашда санаторийга навбатга қўйиш ва ногиронлиги бўлган шахсларга бериладиган имтиёзлар тўғрисида хабардор қилиш тартиби жорий этилади;
- 2024 йил 1 июндан бошлаб, ёлғиз яшаётган ҳамда ёлғиз кексалар ва ногиронлиги бўлган шахсларга Тошкент шаҳрида эксперимент тариқасида тегишли йўналишдаги нодавлат ташкилотлар орқали Ижтимоий ҳимоя миллий агентлиги маблағлари ҳисобидан ижтимоий хизматлар кўрсатиш амалиёти йўлга қўйилади;
- йил давомида ногиронлиги бўлган шахсларни замонавий протез-ортопедия мосламалари ва реабилитация қилиш техник воситалари билан таъминлашнинг янги тизими босқичма босқич жорий қилинади.
Бу вазифалар ижроси учун Ижтимоий ҳимоя миллий агентлиги ҳамда Иқтисодиёт ва молия вазирлигини масъул қилиб белгилаш таклиф этилган. Давлат дастури лойиҳаси бўйича жамоатчилик муҳокамаси 14 февралгача давом этади.
Эслатиб ўтамиз, 2024 йилда Пенсия жамғармасига давлат бюджетидан 16 триллион сўм маблағ ажратилиши белгиланган. Бу миқдор 2023 йилдагидан бир триллион сўмга кўп. Прогнозларга қараганда, 2025 йилда жамғармага 19 триллион сўм, 2026 йилда 23 триллион сўм маблағ йўналтирилади.
Изоҳ (0)