Япония халқаро ҳамкорлик агентлиги (JICA) Ўзбекистонда чорвачилик соҳасини ривожлантириш лойиҳаси учун 200 миллион доллар ажратади. Бу ҳақда “Ўзчармсаноат” уюшмаси матбуот хизмати маълум қилди.
Қайд этилишича, Ветеринария ва чорвачиликни ривожлантириш қўмитаси раиси Баҳром Норқобилов бошчилигидаги Ўзбекистон делегацияси Токиода JICA вице-президенти Сачико Имото билан учрашган.
Ташкилот раҳбариятига Ўзбекистонда чарм-пойабзал соҳасини ривожлантириш борасидаги ишлар, жумладан, хом ашёни чуқур қайта ишлаш, ундан тайёр маҳсулотлар олиш бўйича Ўзбекистон тажрибаси, инвестиция, экспорт салоҳияти тўғрисида маълумот берилган.
JICA’дан жалб қилинадиган 200 миллион доллар чорвачилик, чарм-саноат, балиқчилик, паррандачилик соҳаларидаги тадбиркорлик субъектларига имтиёзли кредитлар бериш орқали молиявий қўллаб-қувватланади.
Жумладан, ушбу ўзлаштириладиган маблағларнинг 40 миллион доллари терини қайта ишлаш ва тайёр маҳсулотлар ишлаб чиқариш йўналишида фаолият юритиш ниятида бўлган тадбиркорларга имтиёзли кредит шаклида ажратилади.
Аввалроқ Ўзбекистонда чорвачилик хўжаликларига 2025 йил 31 декабргача давлат томонидан хориждан импорт қилинган наслдор қорамолнинг ҳар бир бошига 2 миллион сўм, наслдор қўй ва эчкининг ҳар бир бошига 400 минг сўм миқдорда субсидия ажратилиши тўғрисида хабар берилганди.
Изоҳ (0)