Тожикистонда автомобилларни қайта ишлаш учун мажбурий тўлов жорий этилди. Автомобиль эгалари тоифасига қараб 360 дан 2880 сомонийгача (тахминан 33 доллардан 264 долларгача) тўлашлари керак бўлади. Бу ҳақда AsiaPlus хабар берди.
Давлат йўл инспекцияси жамоатчилик билан алоқалар бўлими бошлиғи Саидмўмин Ҳасанзода бундай тўлов ҳукуматнинг 2023 йил 30 декабрдаги қарори асосида жорий этилганини тасдиқлади. Унга кўра, тўлов миқдори транспорт воситаларининг тоифасига боғлиқ:
- мототцикл эгалари учун — 360 сомоний (33 доллар);
- 10 дан ортиқ кишини ташишга мўлжалланган автомобиллар ва бошқа транспорт воситалари учун — 1584 сомоний (145 доллар);
- юк автомобиллари, кранлар ёки оғир автомашиналар учун — 2880 сомоний (264 доллар).
Давлат йўл инспекцияси вакилининг айтишича, бу сумма транспорт воситасининг бутун фойдаланиш муддати учун бир марта тўланади ва тасдиқловчи ҳужжат берилади.
Автотранспорт эгалари учун янги мажбурий тўлов амалдагиларига қўшилади: ҳар йили улар техник кўрик, суғурта, экологик тўловлар ва бошқа “хизматлар” учун 1000 сомонийдан ортиқ тўлайди.
Изоҳ (0)