Tojikistonda avtomobillarni qayta ishlash uchun majburiy to‘lov joriy etildi. Avtomobil egalari toifasiga qarab 360 dan 2880 somoniygacha (taxminan 33 dollardan 264 dollargacha) to‘lashlari kerak bo‘ladi. Bu haqda AsiaPlus xabar berdi.
Davlat yo‘l inspeksiyasi jamoatchilik bilan aloqalar bo‘limi boshlig‘i Saidmo‘min Hasanzoda bunday to‘lov hukumatning 2023-yil 30-dekabrdagi qarori asosida joriy etilganini tasdiqladi. Unga ko‘ra, to‘lov miqdori transport vositalarining toifasiga bog‘liq:
- mototsikl egalari uchun — 360 somoniy (33 dollar);
- 10 dan ortiq kishini tashishga mo‘ljallangan avtomobillar va boshqa transport vositalari uchun — 1584 somoniy (145 dollar);
- yuk avtomobillari, kranlar yoki og‘ir avtomashinalar uchun — 2880 somoniy (264 dollar).
Davlat yo‘l inspeksiyasi vakilining aytishicha, bu summa transport vositasining butun foydalanish muddati uchun bir marta to‘lanadi va tasdiqlovchi hujjat beriladi.
Avtotransport egalari uchun yangi majburiy to‘lov amaldagilariga qo‘shiladi: har yili ular texnik ko‘rik, sug‘urta, ekologik to‘lovlar va boshqa “xizmatlar” uchun 1000 somoniydan ortiq to‘laydi.
Izoh (0)