Европа Иттифоқи Афғонистондаги “Толибон” ҳукмронлигини тан олмайди, деди Европа кенгаши президенти Шарль Мишель 2 июнь куни Чўлпонотада Марказий Осиё давлатлари раҳбарлари билан учрашувда.
У Марказий Осиё ва Европа Иттифоқи давлатлари терроризмга қарши кураш олиб бориши зарурлигини қайд этди.
Афғонистондаги вазият ҳақида гапирар экан, Мишель бу масалада устувор вазифаларни белгилашда Марказий Осиё давлатлари ёрдам берганини айтди. У Европа Иттифоқи Афғонистонга гуманитар ёрдам кўрсатишини таъкидлади.
“Биласиз, Европа Иттифоқи “Толибон” ҳукуматини тан олмайди, чунки биз аёллар ҳуқуқларини ҳимоя қилиш тарафдоримиз. Биз Афғонистон ўз халқаро мажбуриятларини бажариши учун ҳамма нарсани қиламиз”, — деди у.
Мишель, шунингдек, Марказий Осиё давлатлари билан ҳамкорликда илгари сурилиши керак бўлган бир қанча йўналишларни аниқлаб олмоқчилигини айтди.
“Биз сиз билан чегараларни мустаҳкамлаш механизмини кучайтириш бўйича ҳамкорлик қилишга тайёрмиз”, — дея қўшимча қилди у.
Бугун, 2 июнь куни Қирғизистоннинг Чўлпонота шаҳрида “Марказий Осиё – Европа Иттифоқи” иккинчи минтақавий учрашув бўлиб ўтмоқда. Тадбир кун тартибидан Марказий Осиё мамлакатларининг Евроиттифоқ билан конструктив мулоқотини янада ривожлантириш ва амалий ҳамкорлигини кенгайтириш масалалари ўрин олган. Учрашув доирасида Ўзбекистон президенти Шавкат Мирзиёев Шарль Мишель билан музокара ўтказди.
Бундай форматдаги биринчи минтақавий учрашув 2022 йил 27-октябрь куни Остона шаҳрида бўлиб ўтган эди.
Изоҳ (0)