Охирги уч йил давомида Тошкент шаҳри аҳолиси бошқа ҳудудлардагига қараганда энг кўп ипотека кредитлари олмоқда. Бу ҳақда Марказий банк эълон қилган инфографикада маълумот берилган.
Ҳисоб–китобларга кўра, 2023 йилда Ўзбекистонда 68 минг 395 нафар фуқарога 16 триллион 851 миллиард сўм ипотека кредитлари ажратилган. Шундан энг кўп миқдор Тошкент шаҳри ҳиссасига тўғри келади — 5 триллион сўм. Пойтахт аҳолисига 2022 йилда ҳам бошқа ҳудудлардагига нисбатан энг кўп — 4,3 триллион сўм, 2021 йилда эса 2,6 триллион сўм ипотека кредитлари берилган.
Ўтган йилда Фарғона (1,3 триллион сўм), Навоий, Тошкент ва Самарқанд вилоятлари аҳолисига (ҳар бирига 1,2 триллион сўмдан) нисбатан юқори миқдордаги ипотека кредитлари ажратилган. Энг кам кредит олганлар Сирдарё вилояти (380 миллиард сўм) аҳолиси бўлган.
2023 йилдаги ипотека кредитларининг 10,7 триллион сўмини (63 фоизи) эркаклар, 6 триллион сўмини (37 фоизи) аёллар олган.
Кредитларнинг 69 фоизи 31–50 ёшгача, 20 фоизи 18–30 ёшгача, 11 фоизи 50 ёшдан юқори фуқаролар ҳиссасига тўғри келган.
Марказий банк ҳисоботида сўнгги 6 йилда аҳолига жами 62,9 триллион сўм ипотека кредитлари ажратилгани келтирилган. Хусусан, аҳолига:
- 2018 йилда 4,8 триллион сўм;
- 2019 йилда 7,9 триллион сўм;
- 2020 йилда 9,1 триллион сўм;
- 2021 йилда 9,8 триллион сўм;
- 2022 йилда 14,4 триллион сўм ипотека кредитлари берилган.
Аввалроқ Марказий банк 2023 йилнинг ўтган даврида кредит фоизлари қандай ўзгаргани бўйича инфографика эълон қилганди.
Изоҳ (0)