Шимолий Корея етакчиси Ким Чен Ин мамлакат ҳудудлари иқтисодиёти оғир аҳволда эканини тан олди.
“Маҳаллий аҳолини асосий эҳтиёжлар — озиқ-овқат ва истеъмол товарлари билан таъминлай олмаслик жиддий сиёсий муаммога айланди, бунга партиямиз ва ҳукуматимиз ҳеч қачон кўз юмолмайди”, — дея унинг сўзларидан иқтибос келтирган Yonhap агентлиги.
Ким Чен Ин ҳудудлар иқтисодиёти “даҳшатли аҳволда” эканини таъкидлаб, баъзи идоралар ва иқтисодий муассасалар қуруқ гап-сўз билан машғул бўлиб, зарур реал имкониятларни топа олмаганини танқид қилди.
КХДР раҳбари замонавий заводлар қуриш зарур бўлган ҳудудларда иқтисодий ривожланиш муҳимлигини таъкидлаб, давлат томонидан жиддий қўллаб-қувватлашни ваъда қилди.
Yonhap хабарига кўра, Ким Чен Ин Корея халқ армияси аскарларини ҳудудларни саноатни ривожлантириш муаммоларини ҳал қилиш учун жалб этиш ҳақидаги фармонни ҳам имзолаган.
Шу билан бирга, Шимолий Корея олий раҳбарияти Пхеньян ва мамлакат минтақалари ўртасидаги иқтисодий ривожланишдаги ўсиб бораётган тафовутни қисқартириш учун қатъий чоралар кўришга аҳд қилгани ҳам айтиб ўтилган.
“Шимолий Корея Пхеньянда ресурсларни жамлаган. Пхеньян ва минтақалар ўртасидаги тафовут ошган бўлиши мумкин ва расмийлар вазият кескинроқ чоралар кўришни талаб қиладиган даражага ёмонлашганини англаб етди”, — дейилади Yonhap агентлиги хабарида.
Изоҳ (0)