Kim Chen In mamlakatning bir qator hududlarida iqtisodiyot og‘ir ahvolda ekanini tan oldi

Shimoliy Koreya yetakchisi Kim Chen In mamlakat hududlari iqtisodiyoti og‘ir ahvolda ekanini tan oldi.

“Mahalliy aholini asosiy ehtiyojlar — oziq-ovqat va iste’mol tovarlari bilan ta’minlay olmaslik jiddiy siyosiy muammoga aylandi, bunga partiyamiz va hukumatimiz hech qachon ko‘z yumolmaydi”, — deya uning so‘zlaridan iqtibos keltirgan Yonhap agentligi.

Kim Chen In hududlar iqtisodiyoti “dahshatli ahvolda” ekanini ta’kidlab, ba’zi idoralar va iqtisodiy muassasalar quruq gap-so‘z bilan mashg‘ul bo‘lib, zarur real imkoniyatlarni topa olmaganini tanqid qildi.

KXDR rahbari zamonaviy zavodlar qurish zarur bo‘lgan hududlarda iqtisodiy rivojlanish muhimligini ta’kidlab, davlat tomonidan jiddiy qo‘llab-quvvatlashni va’da qildi.

Yonhap xabariga ko‘ra, Kim Chen In Koreya xalq armiyasi askarlarini hududlarni sanoatni rivojlantirish muammolarini hal qilish uchun jalb etish haqidagi farmonni ham imzolagan.

Shu bilan birga, Shimoliy Koreya oliy rahbariyati Pxenyan va mamlakat mintaqalari o‘rtasidagi iqtisodiy rivojlanishdagi o‘sib borayotgan tafovutni qisqartirish uchun qat’iy choralar ko‘rishga ahd qilgani ham aytib o‘tilgan.

“Shimoliy Koreya Pxenyanda resurslarni jamlagan. Pxenyan va mintaqalar o‘rtasidagi tafovut oshgan bo‘lishi mumkin va rasmiylar vaziyat keskinroq choralar ko‘rishni talab qiladigan darajaga yomonlashganini anglab yetdi”, — deyiladi Yonhap agentligi xabarida.