Охирги 30 йиллик даврда паркинсонизм кўпаймоқда. Бу ҳақда Асаб ва руҳият илмий-тиббий маркази директори, профессор Зарифбой Ибодуллаев “Дарё” мухбирига берган интервьюсида айтиб ўтди.
Зарифбой Ибодуллаевнинг айтишича, паркинсонизм асосан 40-50 ёшдан ошганларда кузатиладиган бир қўлда титроқ, мушаклар қотиши, юздаги ҳиссий ифоданинг йўқолиши ва шу сабабли ҳаракат чекланиши билан намоён бўладиган касаллик.
Баъзи ҳолатларда паркинсонизм 30 ёшда ҳам бошланиши мумкин. Бу ювенилний паркинсонизм дейилади.
Халқ орасида паркинсонизмнинг давоси йўқ, деган қараш кенг тарқалган, албатта, бу нотўғри. Паркинсонизмга қарши дорилар ишлаб чиқарилган ва улар белгиланган тартибда қабул қилинса, касалликни анча сусайтириши, беморнинг аҳволини яхшилаши мумкин, — деди профессор.
Унинг алоҳида таъкидлашича, паркинсонизмнинг титроқли турида жарроҳлик, бош мияга чип қўйиб даволаш ҳозирда кенг тарқалган. Бу усул Ўзбекистонга ҳам кириб келмоқда.
Агар охирги 30 йиллик давр билан ҳисоблайдиган бўлсак, паркинсонизм кўпайган. Бу касалликка наслий омиллар ҳам сабаб бўлиши мумкин. Бош мия жароҳатлари, қон-томир касалликлари ва токсик омиллар туфайли паркинсонизм кўпайиб бормоқда.
Касаллик вақтида даволанмаса, мушаклар қотиши, қўллардаги титроқлар кучайиб бориб беморнинг ўзига хизмат қилиш даражаси кескин тушиб кетади, — деди Зарифбой Ибодуллаев.
Изоҳ (0)