Oxirgi 30-yillik davrda parkinsonizm ko‘paymoqda. Bu haqda Asab va ruhiyat ilmiy-tibbiy markazi direktori, professor Zarifboy Ibodullayev “Daryo” muxbiriga bergan intervyusida aytib o‘tdi.
Zarifboy Ibodullayevning aytishicha, parkinsonizm asosan 40-50 yoshdan oshganlarda kuzatiladigan bir qo‘lda titroq, mushaklar qotishi, yuzdagi hissiy ifodaning yo‘qolishi va shu sababli harakat cheklanishi bilan namoyon bo‘ladigan kasallik.
Ba’zi holatlarda parkinsonizm 30 yoshda ham boshlanishi mumkin. Bu yuvenilniy parkinsonizm deyiladi.
Xalq orasida parkinsonizmning davosi yo‘q, degan qarash keng tarqalgan, albatta, bu noto‘g‘ri. Parkinsonizmga qarshi dorilar ishlab chiqarilgan va ular belgilangan tartibda qabul qilinsa, kasallikni ancha susaytirishi, bemorning ahvolini yaxshilashi mumkin, — dedi professor.
Uning alohida ta’kidlashicha, parkinsonizmning titroqli turida jarrohlik, bosh miyaga chip qo‘yib davolash hozirda keng tarqalgan. Bu usul O‘zbekistonga ham kirib kelmoqda.
Agar oxirgi 30 yillik davr bilan hisoblaydigan bo‘lsak, parkinsonizm ko‘paygan. Bu kasallikka nasliy omillar ham sabab bo‘lishi mumkin. Bosh miya jarohatlari, qon-tomir kasalliklari va toksik omillar tufayli parkinsonizm ko‘payib bormoqda.
Kasallik vaqtida davolanmasa, mushaklar qotishi, qo‘llardagi titroqlar kuchayib borib bemorning o‘ziga xizmat qilish darajasi keskin tushib ketadi, — dedi Zarifboy Ibodullayev.
Izoh (0)