Баъзи машҳурларга омад кулиб боқади: уларга туғилганданоқ ажойиб исм ва фамилиялар берилади, айримлар эса бу соҳадаги бошқа ҳамкасбларидан фарқ қилиш учун исмини бир оз ўзгартириши ёки уларни бутунлай алмаштириши керак бўлади.
Лили Жеймс
Аслида актрисанинг исми — Лили Хлое Нинетт Томсон. У тахаллус сифатида эрта вафот этган отаси, мусиқачи Жеймс Томсоннинг исмини олган. Ёш актриса Актёрлар гилдиясида аллақачон Лили Томсон исмли актриса борлиги сабабли тахаллус танлаш заруратига дуч келгач, ҳеч иккиланмасдан отасининг исмидан фойдаланади.
Вин Дизель
Актёрнинг ҳақиқий исми — Марк Синклердир. У ижодий карьерасини бошлашдан олдин ўзини “Вин Дизель” деб атай бошлаган. Ўша пайтда у тунги клубда қўриқчи бўлиб ишлаган, у ўзига янада жарангдор ва “кучли” тахаллус керак деб ҳисоблаган.
У тахаллуси учун отаси — ўқитувчи ва театр менежери Ирвинг Винсент фамилиясининг биринчи бўғинини олади. Бўлажак актёр тахаллусининг иккинчи қисмини эса дўстлари беради — улар актёрни дизелли двигатель каби энергияга эга эканлигига ишора қилган.
Одри Ҳепбёрн
Одри Кетлин Растон аристократлар оиласида туғилган. Унинг отаси Жозеф Виктор Энтони Растон ўзини Шотландия қироличаси Мерининг учинчи эри, Дюк Жеймс Ҳепбёрннинг авлоди деб ишонган. Шунинг учун отаси ўз фамилиясини Ҳепбёрн-Растонга ўзгартиради.
Кичкина Одри ҳам қўшалоқ фамилия олади, аммо кейинчалик қиз балет билан шуғулланиб, фильмларда рол ўйнашни ва моделлик қилишни бошлагач, фамилиясидаги Растон қисмини олиб ташлайди.
Бен Кингсли
Кришна Пандит Бҳанжи исми туфайли ишга кира олмаганини тан олади, исми титрларда ғалати кўринарди. Аммо ёш актёр ўзини “Бен Кингсли” деб аташи биланоқ, карьераси дарҳол бошланади. Продюсерлардан бири ҳатто унга мусиқа билан шуғулланишни ва поп юлдузи бўлишни таклиф қилади. Кингсли бу таклифни рад этади: ўша пайтда у Қироллик Шекспир труппасига қўшилишга қарор қилганди.
Вайнона Райдер
Туғилганда, актриса Вайнона Лаура Ҳоровиц деб аталган. У тахаллусини отаси мухлис бўлган қўшиқчи Митч Райдер шарафига олади. 1986 йилда Вайнона ўзининг биринчи ролини ўйнайди. Ундан титрда қандай исм остида чиқишини сўрашганда, қиз кастингга юборган кассетадаги фонда Митч Райдер қўшиғи янграганини эслайди. Шу тариқа актриса Райдер тахаллусини олади.
Николас Кейж
Актёрнинг ҳақиқий исми — Николас Ким Коппола. Отаси томондан у режиссёр Френсис Форд Копполанинг жияни, шунингдек, режиссёрлар Роман Коппола ва София Копполанинг амакиваччаси.
Фаолияти бошида Николас ҳатто машҳур амакисининг бир нечта фильмларида рол ўйнаган. Аммо кейин у ўзи муваффақиятга эришишга қарор қилади ва режиссёрлар уни машҳур сулола вакили бўлгани туфайли рол бермасликлари учун Николас Кейжга айланади. Актёр ўз фамилиясини комикслар супер қаҳрамони Люк Кейждан олган.
Хоакин Феникс
Хоакин Рафаэл Боттомга фамилиясини ўзгартиришга ота-онаси ёрдам беради. Улар оиласига кулдан яралиб, янги ҳаёт бошлайдиган афсонавий қуш Феникс номини фамилия сифатида танлашади. Натижада уларнинг беш нафар фарзанди, жумладан Хоакин ҳам янги фамилияга эга бўлади.
Вупи Голдберг
Ёш Керин Элейн Жонсон фамилиясини “етарлича жарангдор эмас” деб ўйлайди, шунинг учун уни янада ёрқинроқ ва эсда қоларлиси билан алмаштиради. Актрисанинг тахаллуси болалигидаги “Вупи” лақабидан келиб чиққан бўлиб, таржима қилинганда “ёстиқча” деган маънони англатади.
Деми Мур
Деми Жин Гайнс шоу-бизнесга жуда ёшлигида кириб келган. 18 ёшида у ўзидан 12 ёш катта бўлган қўшиқчи Фредди Мурга турмушга чиқади. Деми эрининг фамилиясидан тахаллус сифатида фойдаланган ва ажрашгандан кейин ҳам ўзида сақлаб қолган.
Брюс Уиллис
Уолтер Брюс Уиллис исмининг биринчи қисмидан воз кечади. Унинг эслашича, ёшлигида у дудуқланган, шу сабаб исмини айтишга қийналган. Натижада синфдошларининг масхараларига нишон бўлган. Улар кичик Уолтерга “Бак-Бак” деб лақаб қўйиб олишади. Аммо тез орада болакай театр гуруҳига қўшилади ва нутқидаги нуқсонлардан бутунлай халос бўлади.
Изоҳ (0)