Осиё Кубоги. Эрон БААни мағлуб этди, Фаластин эса Гонгконг устидан йирик ҳисобда ғалаба қозонди

Футбол бўйича Осиё Кубоги гуруҳ босқичи 3-туридан ўрин олган ўйинлар 23 январь, сешанба куни бўлиб ўтди.

C гуруҳида Эрон БААга қарши баҳс олиб борди. Учрашувнинг 26-дақиқасида Меҳди Тареми дарвозани ишғол қилди. Биринчи бўлим ушбу ҳисоб билан якунланди. 

Иккинчи бўлимда эронликлар ҳисобни ишончли кўринишга олиб келди. 65-дақиқада Тареми яна бир бор ўз номини таблога ёздириб қўйди. Ўйин охирида эса БАА жавоб голини уришга муваффақ бўлди. 90+3-дақиқада Яҳё Алгассани дарвозани аниқ мўлжалга олди. Шу тариқа учрашув Эроннинг 2:1 ҳисобидаги ғалабаси билан якунланди.

Гуруҳнинг иккинчи ўйинида Фаластин Гонгконг устидан 3:0 ҳисобида зафар қучди. Фаластинликлар сафида Одай Дабаг дубль муаллифига айланган бўлса, яна битта гол Заид Кунбар ҳисобига ёзилди.

C гуруҳи якунларига кўра жадвал қуйидагича кўриниш олди:

Осиё Кубоги

3-тур баҳслари

23 январь, сешанба

Эрон — БАА 2:1

Голлар: 1:0 – 26 Тареми, 2:0 – 65 Тареми, 2:1 — 90+3 Алгассани.

Гонгконг — Фаластин 0:3

Голлар: 0:1 – 12 Дабаг, 0:2 – 48 Кунбар, 0:3 – 60 Дабаг.