Ҳиндистоннинг Буландшаҳр қишлоғида 92 ёшли Салима Хон (Амма ҳам деб аташади) текин тушлик учун мактабга бораётгани ва сўнгги икки йилдаги ўқиши ҳақида гапириб берди.
“Мактабда бепул тушлик тайёрланади ва Амма камбағал бўлгани учун мактабда болаларга нима берилишини билиш учун келган. У учун таълим олиш катализатор бўлиб хизмат қилмоқда”, — деди бошланғич мактаб директори Пратибха Шарма.
Амманинг сўзларига кўра, у деярли икки йилдан бери мактабга қатнамоқда. “Улар менга ҳамма нарсани ўргатди. Энди мен ўқий ва ҳисоблай оламан”, — деди у. Лекин кўзи хиралашгани туфайли ёзишда қийналмоқда, шунингдек, эшитиш билан боғлиқ муаммолар ҳам ўрганишга тўсқинлик қиляпти.
“У сизга алифбони айтиб бера олмайди, лекин эшитиш орқали бирор нарсани ўргана олиши мумкин. Оғзаки ўрганиш яхши иш бермоқда”, — дея қўшимча қилди Шарма. Энди у миллий имтиҳон топшириши керак. Агар ҳаммасини муваффақиятли топширса, унга саводини тасдиқловчи сертификат берилади.
Амма мактабга бориш ва ўқиш унга ёқаётганини таъкидлади. Ундан илҳом олган кўплаб маҳаллий қизлар, шунингдек, 20 га яқин аёллар мактабга боришни бошлади.
Салима Хон 1931 йилда туғилган ва Ҳиндистон Британия мустамлакасидан озод бўлишдан икки йил олдин, 14 ёшида турмушга чиққан. Унинг қишлоғида мактаб бўлмаган, лекин унда ёзиш ва ўқишни ўрганиш хоҳиши катта бўлган.
Изоҳ (0)