Hindistonning Bulandshahr qishlog‘ida 92 yoshli Salima Xon (Amma ham deb atashadi) tekin tushlik uchun maktabga borayotgani va so‘nggi ikki yildagi o‘qishi haqida gapirib berdi.
“Maktabda bepul tushlik tayyorlanadi va Amma kambag‘al bo‘lgani uchun maktabda bolalarga nima berilishini bilish uchun kelgan. U uchun taʼlim olish katalizator bo‘lib xizmat qilmoqda”, — dedi boshlang‘ich maktab direktori Pratibxa Sharma.
Ammaning so‘zlariga ko‘ra, u deyarli ikki yildan beri maktabga qatnamoqda. “Ular menga hamma narsani o‘rgatdi. Endi men o‘qiy va hisoblay olaman”, — dedi u. Lekin ko‘zi xiralashgani tufayli yozishda qiynalmoqda, shuningdek, eshitish bilan bog‘liq muammolar ham o‘rganishga to‘sqinlik qilyapti.
“U sizga alifboni aytib bera olmaydi, lekin eshitish orqali biror narsani o‘rgana olishi mumkin. Og‘zaki o‘rganish yaxshi ish bermoqda”, — deya qo‘shimcha qildi Sharma. Endi u milliy imtihon topshirishi kerak. Agar hammasini muvaffaqiyatli topshirsa, unga savodini tasdiqlovchi sertifikat beriladi.
Amma maktabga borish va o‘qish unga yoqayotganini taʼkidladi. Undan ilhom olgan ko‘plab mahalliy qizlar, shuningdek, 20 ga yaqin ayollar maktabga borishni boshladi.
Salima Xon 1931-yilda tug‘ilgan va Hindiston Britaniya mustamlakasidan ozod bo‘lishdan ikki yil oldin, 14 yoshida turmushga chiqqan. Uning qishlog‘ida maktab bo‘lmagan, lekin unda yozish va o‘qishni o‘rganish xohishi katta bo‘lgan.
Izoh (0)