Украина Қуролли кучлари (УҚК) рус қўшинлари ҳужумини қайтариш учун ўзининг “Суровикин чизиғи”ни қурмоқда, деб ёзди Британиянинг The Telegraph газетаси. Нашрга кўра, Украина қуролли кучларининг муваффақиятсиз қарши ҳужумидан сўнг фронт муҳим қисмларида янги истеҳкомлар пайдо бўла бошлаган. Улар орасида окоплар, танкка қарши бетонли “аждар тишлари” ва ерости қўмондонлик пунктлари бор. Ҳудуд фаол равишда миналаштириляпти.
Ноябрь ойи охирида Украина президенти Володимир Зеленский “барча асосий йўналишлар” бўйича истеҳкомлар қурилишини тезлаштиришни буюрган эди. Шундан сўнг, The Telegraph ёзишича, Донецк вилоятидаги Лиман ва Авдеевка ҳудудларида, шунингдек, қўшни Харьков вилоятидаги Купянск яқинида истеҳкомлар қурилиши авж олди. Бундан ташқари, Украинанинг Россия ва Беларусь билан чегарасида истеҳкомлар барпо этилмоқда.
Украинанинг “фаол мудофаа” стратегияси
“Янги мудофаа иншоотлари Суровикин чизиғини жуда эслатади – уч даражали окоплар, танк тузоқлари ва таянч нуқталари тизими. Улардан Россия Украинанинг қарши ҳужумини тўхтатиш учун муваффақиятли фойдаланган”, — дейилади материалда.
Бироқ гап Россия қурган бир хил даражада мураккаб ва кучли истеҳкомлар ҳақида кетмаяпти, чунки Украина Қуролли кучлари истеҳкомларни ҳимоя қилиш ва ҳужум операцияларини бирлаштирган ҳолда “фаол мудофаа” ўтказиш ниятида. Нашр таъкидлашича, шунга ўхшаш стратегия аввал ҳам қўлланган, хусусан, унинг ёрдамида Украина Қуролли кучлари 2022 йил кузида Харьков вилоятининг муҳим қисмини озод қилишга муваффақ бўлган.
Изоҳ (0)