Ҳиндистондан Тошкентга учган самолёт Афғонистонда қулаб тушди (видео)

Ҳиндистоннинг Гая шаҳридан Тошкентга учган Falcon-10 самолёти ҳалокатга учради. Бу ҳақда “Толибон” ҳаракатига таяниб, Hasht-e Subh Daily хабар берди. Маълумотни “Росавиация” тасдиқлади.

Самолёт радардан ғойиб бўлганини дастлаб “Новости Ташкенцкого неба” канали ёзди. Унда “ГазПромАвиа”га тегишли бизнес-жет Гая—Тошкент—Москва йўналишида учаётган бўлгани айтилган. Самолёт соат 19:30 да Тожикистоннинг Кўлоб аэропортига яқинлашганда радарлардан ғойиб бўлган.

“Экипаж соат 19:05 да фавқулодда ёнилғи қолгани ва Кўлоб аэродромига қўнишга қарор қилингани ҳақида хабар берган. Кейинчалик битта, кейин эса иккинчи двигател ишдан чиққан. Самолёт бортида 8 киши — 4 нафар йўловчи ва 4 нафар экипаж аъзоси бўлган”, — дейилади хабарда.

“Росавиация”га кўра, 20 январь куни кечқурун Афғонистон ҳаво ҳудудида Россия фуқаролик самолётлари давлат реестрида рўйхатга олинган Falcon 10 самолёти радардан ғойиб бўлган.

Дастлабки маълумотларга кўра: самолёт бортида 6 киши — тўрт экипаж аъзоси ва икки йўловчи бўлган.

Falcon 10 (рўйхатга олиш рақами RA-09011; серия рақами 128) 1978 йилда Франциянинг Dassault Aviation компанияси томонидан ишлаб чиқарилган. Самолёт Аthletic Group МЧЖ ва хусусий шахсга тегишли.

Самолёт Гая (Ҳиндистон) – Тошкент (Ўзбекистон) – Жуковский (Россия) йўналиши бўйича чартер рейсни амалга оширган. Ҳозирда самолётни қидириш ишлари кетмоқда.

“Толибон” Ахборот вазирлиги матбуот хизмати раҳбари Абдул-Воҳид Райанга кўра, бортда етти нафар россиялик бўлган.