Эрон ‘‘Сорайя’’ сунъий йўлдошини орбитага олиб чиқди

Эрон ‘‘Сорайя’’ сунъий йўлдоши паст Ер орбитасига муваффақиятли учирилганини эълон қилди, деб хабар берди EFE агентлиги.

Бунинг учун эронлик муҳандислар 100 килограммгача юк кўтара оладиган ‘‘Qaem-100’’ ракетасидан фойдаланди.

Бироқ Эрон расмийлари сунъий йўлдош қандай вазифани бажариш учун мўлжалланганини ошкор қилмади.

Эрон ядро қуролига эга бўлмоқчи деб гумон қилаётган АҚШ ва унинг қатор иттифоқчилари эронлик мутахассислар космик дастурдан баллистик технологияларни синовдан ўтказиш учун фойдаланишидан хавотирда. Бундай технологиялар, асосан, ядро қуролини етказиб бериш воситаларини яратиш учун зарур бўлади.

Эрон томони ядро дастури тинч мақсадли эканига ишонтирмоқда. Теҳрон космик дастурдан воз кечиш ниятида эмас.