Uzbekistan Airports бугун, 20 январь куни соат 08:08 дан бошлаб Бухоро аэропортида ҳаво кемаларини қабул қилишга чекловлар жорий этилганини маълум қилди.
![](/static/2023/Fozilbek/photo_2024-01-18_10-27-25sds4.jpg)
Қайд этилишича, қуюқ туман сабаб кўриш масофаси 100 метрни ташкил этмоқда. Silk Avia авиакомпаниясининг Тошкент—Бухоро йўналиши бўйича учган US-803 рейси экипажи Самарқанддаги муқобил аэродромга йўл олишга қарор қилган. Бортида 58 йўловчи бўлган самолёт маҳаллий вақт билан соат 09:05 да Самарқандга қўнган.
Бундан олдин Uzbekistan Airways авиакомпаниясининг HY-212 Рига—Тошкент рейсини соат 23:26 да амалга ошираётган самолёт Самарқанддаги муқобил аэродромга қўнгани тўғрисида хабар берилганди. Шунингдек, Silk Avia авиакомпаниясининг USA-751 рейси Термиз аэропортидаги ноқулай об-ҳаво шароити (чанг бўрони) туфайли Қарши аэродромига йўналтирилган эди.