Марҳум ижодкор Охунжон Мадалиевнинг ўғли Қиличбек отасининг изидан бориб, санъат йўлини танлади. Озми-кўпми машҳурликка эришиб, ўз мухлисларини топди. Хўш, 34 ёшни қаршилаган хонанда фаолиятини қандай бошлади, агар отаси санъаткор бўлмаганида у хонанда бўла олармиди?
“Тортинчоқ йигит бўлганман”
Қиличбек Мадалиев 1990 йилнинг 17 январь куни Фарғона вилоятининг Олтиариқ туманида дунёга келган. У оилада икки қиздан кейин дунёга келган ўғил фарзанд бўлган.
— Онамнинг айтишича, дадам раҳматли “Тезроқ ўғлим улғайса, уни тўйларга олиб борсам”, деб кўп гапирган экан. Мен ҳам 3-4 марта ўзи билан тўйга олиб борганини эслайман. Аммо болаликдан ниҳоятда тортинчоқ йигит бўлганим учун одамлар билан тил топишиб кетолмасдим. Тўйларда зерикиб, бир бурчакда ўтираверардим. Шу боис “Йўқ, мен тўйга бормайман”, деганман.
Болалигим жуда оддий ўтган. Кўпчилик санъаткорлар мактаб тадбирларида фаол бўлгани, қўшиқлар айтиб танловларда иштирок этганини сўзлаб беради. Мен умуман бошқача бола эдим. 7-синфга қадар бирорта мактаб тадбирида иштирок этмаганман, ҳатто шеър ёдлашни ҳам истамасдим. Дарсларда устозлар мажбуран олд қаторга ўтказмаса, орқа қаторда ўтириб, фақат дарсни тинглардим холос. Шўхликлар, болаларча ўйинқароқликлар умуман бўлмаган, — дейди Қиличбек Мадалиев.
“Дадам оламдан ўтганида 10 ёшда эдим”
Хонанда санъаткор эмас, прокурор бўлишни истагани ҳақида гапирди.
— Тортинчоқ йигит бўлсам ҳам мактабда жуда машҳур эдим. Одамлар қўли билан кўрсатиб “Ана, Охунжон Мадалиевнинг ўғли. Дадасига роса ўхшаркан”, деб пичирлаб гапирганини эшитиб қолардим. Аммо ўша пайтда бирор инсонга дадамнинг номини айтиб мақтанганимни эслолмайман.
Устозлар қайси касбни танлаш ҳақида сўраса, прокурор бўламан дердим. Аммо бу касбнинг нима иш билан шуғулланишини билмасдим. Дадам раҳматли санъаткор бўлишимни орзу қиларди. Дадам оламдан ўтган пайт бор-йўғи 10 ёшда эдим. 13-14 ёшларга бориб ичимда қандайдир олов ловуллагандек бўлди ва ўз-ўзидан санъатга қизиқиб қолдим, — дейди хонанда.
“Одамлар дадам учун пул қистиришди”
Хонанда илк марта тўйга чиққани ва қўшиғи учун эмас, дадасининг ҳурмати учун унга жуда кўп пул қистиргани ҳақида эслади.
— Дадамни жуда кам кўрардим. Дадам уйга келганида биз ухлаб қолардик, эрталаб эса у дам олаётган бўларди. Баъзида ҳафталаб дадамни кўролмасдик. Аммо дадамнинг жуда яхши одати бор эди. “Мен болаларимни соғиндим”, деб кечаси бўлса-да, ёнимизга кириб юз-кўзларимиздан ўпаркан.
Дадам вафот этганидан кейин анча вақт ўтиб, ҳамкасбларидан бири ўзи билан тўйга олиб борадиган бўлди. У пайтда дадамнинг қўшиқларини куйлардим. Бошловчи таништирганидан кейин одамлар кўзида ёш билан қаршилади ва жуда кўп пул қистирди. Ёш боламан, ўзимни қандай тутишни ҳам билмасдим. Пулларнинг барини онамга берганимда “Менинг ўғлим ҳам пул топадиган йигит бўлибди”, деб роса йиғлаганди, — дейди хонанда.
“Дадамнинг душманлари ҳақида гапиришни истамайман”
Қиличбек Мадалиев “Охунжон Мадалиевнинг сирли ўлими ва унга заҳар беришгани” ҳақидаги миш-мишларга ўз муносабатини билдирди.
— Бу гаплар мутлақо асоссиз. Дадамнинг дўстлари жуда кўп бўлган. Душманлари ҳақида гапириб ўтиришни истамайман. Тўғри у пайтда жуда ёш бўлганман, аммо билганим дадамнинг юраги хуруж қилган. Ўлимига суиқасд ва заҳарлаш алоқадор эмас. Яратганнинг белгилаб берган умри бор, агар шундай бўлган тақдирда ҳам пешонада ўлим бўлмаса, одам тирик қолади, — дейди Қиличбек Мадалиев.
“15 ёшимда катта саҳнага чиққанман”
Хонанда илк бор 2005 йил саҳнага чиққани ва “Дадамнинг мухлислари” номли қўшиғининг яратилиш тарихи ҳақида сўзлаб берди.
— Дадамнинг қўшиқларини ижро этиб, тўйларга чиқиб юрган пайтларим эди. Бир куни дадамнинг дўстларидан бири шоир Мирзо Карим билан суҳбатлашиб қолдик. “Дадамнинг мухлислари яхши кутиб олди, дуо қилди”, деб тўлиб-тошиб гапириб бераётганимда “Худди шу ҳақида қўшиқ айтинг”, деб тавсия қилди. Қўшиқнинг мавзуси оддий суҳбат жараёнида пайдо бўлди. Ўша йили Муҳаббат Ҳамроева режиссёр Зокир Қаюмов билан “Унутмоқ осонмас” номли концерт дастурини ўтказадиган бўлди ва мени ҳам таклиф қилди. 2005 йил илк бор катта саҳнага чиққанман. Ўшанда бор-йўғи 15 ёшда эдим. Ишонасизми, одамлар шу қадар кўп гулдасталар берганки, ҳалигача бунча кўп гулни олмаганман. Дадамнинг мухлислари йиғлаган, аммо ёш бўлганим учун бунинг завқини у қадар англаб етмаганман, — дейди Қиличбек Мадалиев.
“Сардор Мамадалиевдан ранжиганман”
Қиличбек отасининг қўшиқларини ижро этгани учун хонанда Сардор Мамадалиевдан ранжигани ва у билан жиддий низога ҳам боргани ҳақида сўзлаб берган.
— Албатта, ранжиганман. Сабаби у қўшиқни бузиб ижро этган. Мухлисларнинг ҳам дили оғриган. Шу боис Сардор Мамадалиев билан бу тарзда қўшиқни бузиб айтмаслик бўйича келишиб олганмиз. Ҳатто, устозлар қўшиқларини бузиб айтадиган хонандаларга бағишлаб Мирзо Карим сўзи асосида қўшиқ ҳам яратгандим, — дейди хонанда Қиличбек Мадалиев.
Шахсий ҳаёти ҳақида гапиришни истамайди
Охунжон Мадалиевнинг икки қиз ва икки ўғил фарзандлари бор. Айни кунда уларнинг барчаси оилали, бу йил кенжа ўғли ҳам уйланди. Қиличбек Мадалиев оиласи ва шахсий ҳаёти ҳақида гапиришни унчалик истамайди. Фақатгина 2015 йил оила қургани ва икки фарзанднинг отаси эканлигини оммага ошкор қилган холос.
Изоҳ (0)