Давлат активларини бошқариш агентлиги “Пахтакор футбол клуби” масъулияти чекланган жамиятининг давлат улуши савдога чиқаргани тўғрисида хабар берилганди. Агентликка кўра, ҳозирда оммавий савдо жараёнлари вақтинча тўхтатилган.
Тегишли хусусийлаштириш дастурларига мувофиқ,16 январь куни Давлат активларини бошқариш агентлигининг расмий веб-сайтида “Пахтакор футбол клуби” МЧЖнинг 100 фоиз давлат улуши бўйича оммавий савдо жараёнлари бошланганлиги тўғрисида эълон берилган эди.
Клубни сотиб олувчи харидор кейинчалик қуйидаги талабларга риоя қилиши керак эди:
- футбол клубининг фаолиятини сақлаб қолиш, ривожлантириш ва халқаро даражага олиб чиқиш;
- футбол клуби балансидаги барча спорт объектларидан, шу жумладан, футбол майдонидан фақатгина спорт фаолияти йўналишларида фойдаланиш;
- “Пахтакор” футбол клуби академияси фаолиятини сақлаб қолиш ва ривожлантириш.
Ўтган давр мобайнида жамоатчилик томонидан билдирилган фикрларни ўрганган ҳолда, “Пахтакор футбол клуби” МЧЖнинг 100 фоиз давлат улуши бўйича оммавий савдо жараёнлари вақтинчалик тўхтатилди, — дейилади хабарда.
Эслатиб ўтамиз, Ўзбекистонда 2020 йилни энг кўп зарар билан якунлаган давлат корхоналари рейтингида “Пахтакор” ҳам бор эди. Футбол клуби рўйхатнинг 9-поғонасидан ўрин эгаллаган ўшанда. Клуб 2020 йилни 82,7 миллиард сўм зарар билан ёпган.
Изоҳ (0)