Арманистон ва Озарбайжон ўзаро муносабатларни тартибга солиш ва давлатлар ўртасида тинчлик шартномасини тузиш ниятида. Бу ҳақда Озарбайжон президенти маъмурияти ва Арманистон бош вазири аппаратининг 7 декабрь куни эълон қилинган қўшма баёнотида айтилади.
“Арманистон ва Озарбайжон минтақада узоқ кутилган тинчликка эришиш учун тарихий имконият мавжудлигини маълум қилади. Ҳар икки давлат суверенитет ва ҳудудий яхлитлик тамойилларини ҳурмат қилиш асосида муносабатларни тартибга солиш ва тинчлик шартномасини тузиш ниятини тасдиқлайди”, — дейилади ҳужжатда.
“Ишончни мустаҳкамлаш учун қадамлар” сифатида томонлар асирга олинган ҳарбий хизматчиларни алмашишга келишиб олди: Боку 32 нафар арманистонлик ҳарбийни, Ереван эса икки озарбайжонлик ҳарбийни озод қилади.
Шунингдек, Арманистон хайрихоҳлик белгиси сифатида Озарбайжон фойдасига БМТнинг иқлим ўзгариши бўйича конференциясига мезбонлик қилиш борасида ўз номзодини қайтариб олди.
“Арманистон ва Озарбайжон Республикаси яқин келажакда амалга ошириладиган ишончни мустаҳкамлаш бўйича кўпроқ тадбирларни амалга ошириш бўйича мунозараларни давом эттиради ва халқаро ҳамжамиятни уларнинг саъй-ҳаракатларини қўллаб-қувватлашга ундайди, бу икки давлат ўртасидаги ўзаро ишончни мустаҳкамлашга ёрдам беради ҳамда бутун Жанубий Кавказ минтақасига ижобий таъсир кўрсатади”, — дейилади баёнотда.
Эслатиб ўтамиз, 2023 йил сентябрда Озарбайжон ҳарбий амалиёт ўтказиб, Тоғли Қорабоғ ҳудуди устидан назоратни тўлиқ тиклади. Тан олинмаган Тоғли Қорабоғ республикаси раҳбари Самвел Шаҳраманян 2024 йил 1 январдан республикани тугатиш тўғрисидаги фармонни имзолади. 100 мингдан ортиқ этник арманлар минтақани тарк этди. 5 октябрь куни Арманистон бош вазири Никол Пашинян Тоғли Қорабоғни Озарбайжоннинг бир қисми деб тан олган декларацияни имзолади.
Изоҳ (0)