Озарбайжон президенти Илҳом Алиев Арманистон билан тинчлик битимини шарҳлар экан, Боку Ереван томонидан Қорабоғ учун “қасос олишга” уринишлар бўлмаслиги тўғрисида кафолат олиши зарурлигини таъкидлади. Унинг сўзларига кўра, Озарбайжон “Арманистонда бўлаётган ишлар”, Ереваннинг Европадаги айрим маслаҳатгўйлари ҳақида билади.
“Озарбайжонга Арманистонда реваншизмга уринишлар бўлмаслиги учун кафолат керак. Биз икки давлат ўртасида умуман уруш бўлмаслигини ва бу борада кафолатлар бўлиши кераклигини истардик”, — деди Алиев Бокудаги “Қорабоғ: 30 йилдан кейин ватанга қайтиш. Ютуқлар ва қийинчиликлар” халқаро форумида сўзлаган нутқида.
Илҳом Алиев Озарбайжон ва Арманистон ўртасидаги музокаралар икки томонлама бўлиши кераклигига яна бир бор эътибор қаратди. 21 ноябрь куни Озарбайжон Ташқи ишлар вазирлиги баёнотида ҳам худди шундай позиция билдирилган. Бокуга кўра, икки томонлама музокаралар “тинчлик битимини имкон қадар тезроқ якунлаш” имконини беради.
Ереван ва Боку ўртасида тинчлик бўйича сўнгги бевосита алоқалар июль ойида бўлиб ўтган. Ундан кейин Арманистон ва Озарбайжон томонлари тинчлик келишувини муҳокама қилиш учун учрашгани йўқ. 19 сентябрь куни Озарбайжон Тоғли Қорабоғда “аксилтеррор операцияси” бошланганини эълон қилди. Ҳарбий ҳаракатлар 20 сентябрь куни якунланди. Жанглар натижасида Озарбайжон Қорабоғ устидан тўлиқ назоратни тиклади.
10 ноябрь куни Арманистон бош вазири Никол Пашинян Озарбайжон билан тинчлик шартномаси 70 фоизга келишилганини айтди. 21 ноябрь куни Озарбайжон Ташқи ишлар вазирлиги Боку тўғридан тўғри музокараларни бошлашга тайёрлиги ҳақида баёнот берди. 22 ноябрь куни эса ҳар икки томон тинчлик битими бўйича муҳокамаларни давом эттириш ниятини тасдиқлади.
Изоҳ (0)