Қозоғистоннинг Арис шаҳридаги новвойхонада газ баллон портлаши оқибатида жароҳатланган ўзбекистонлик аёл вафот этди. Бу ҳақда Otyrar хабар берди.
Портлаш оқибатида жароҳатланган иккинчи жабрланувчи реанимацияда, унинг танасида 30 фоиз куйиш бор. У ҳам Ўзбекистон фуқароси ҳисобланади.
“17 январь куни тахминан соат 13:50 да Ўзбекистон фуқаролари бўлган икки жабрланувчи шифохонага ётқизилган. Иккаласи ҳам куйган, эркакнинг 30 фоиз, аёлнинг эса 70 фоиз танаси куйган. Олинган жароҳатлар оғир эди, шунинг учун улар реанимацияга ётқизилди. Бугун (18 январь) кундузги соат бирларда танасининг 70 фоизи куйган аёл вафот этди. Эркак ҳали ҳам даволанмоқда ва унинг аҳволи барқарор”, — дейди Арис шаҳар марказий туман касалхонаси жарроҳлик бўлими мудири Талгат Тожиметов.
Ҳодиса 17 январь куни содир бўлган. Ёнғин новвойхона ва дўконнинг қарийб икки юз квадрат метр майдонини қамраб олган. Қутқарувчиларнинг сўзларига кўра, баллонлардан бири ёнғин содир бўлган жойга яқин тургани сабабли ундаги газ тезда қизиб, кенгайиб, портлаш содир бўлган.
Улар ёнғин содир бўлган жойга етиб боргач, новвойхонадан ҳар бири 50 литрдан яна иккита газ баллони ва бир хил миқдордаги 25 литрли газ баллонлари олиб чиқиб кетилган.
Изоҳ (0)