“Толибон” ҳаракати импорт қилинган 1680 та қутидаги ёғни сифатсизлиги сабаб Ўзбекистонга қайтариб юборганини маълум қилди. Бу ҳақда Афғонистон Озиқ-овқат ва фармацевтика идораси хабар берди.
Таъкидланишича, тегишли чора Балх вилояти Миллий озиқ-овқат ва зираворлар бошқармаси томонидан амалга оширилган. Улар Ҳайратон портидан талаб қилинадиган стандартларга жавоб бермаган 1680 та қутидаги 5 литрли ёғларни Ўзбекистонга қайтариб юборган.
16 январь куни ҳам Ҳайратон портидан 62 тоннадан ортиқ сифатсиз нефть Ўзбекистонга қайтарилгани маълум қилинганди. Афғонистон Миллий стандартлар бошқармаси сўнгги кунларда ушбу портга маълум миқдорда нефть келганини, бироқ текширувдан сўнг у сифатсизлиги аниқланиб, қайтарилганини таъкидлаган.
Оммавий ахборот воситаларининг ёзишича, аввалроқ ҳам 100 тоннадан ортиқ сифатсиз нефть Ўзбекистонга қайтарилган эди. Дарҳақиқат, бу паст сифатли нефтнинг Ўзбекистонга қайтариб юборилишига оид биринчи ҳолат эмас. Жумладан, 2023 йил август ойида Афғонистон ҳукумати нефть сифати пастлиги сабабли 67 та цистерна нефтни Ўзбекистонга қайтариб юборганди.
Бунга жавобан “Ўзбекнефтгаз” раиси Баҳодир Сиддиқов мазкур хабар нотўғри талқин қилинганини, “Толибон” сифатсиз деб қайтарган маҳсулот аслида юқори сифатли эканини айтган.
Изоҳ (0)