Қозоғистоннинг Уралск шаҳрида икки нафар ўзбекистонлик ўғирланган автомобилда йўл-транспорт ҳодисасини содир этди. Бу ҳақда мамлакат ИИВ матбуот хизмати хабар берди.
Маълум қилинишича, 13 ноябрь куни кечаси полициячиларни Volkswagen Passat автомобили шубҳа уйғотган. Улар ҳайдовчига тўхташ ишорасини кўрсатганида машина буйруққа бўйсунмай ҳаракатни давом эттирган ва оқибатда Абдолов кўчасидаги уйлардан бирининг панжарасига бориб урилган.
Шундан сўнг, ҳайдовчи қўлга олинган. Аниқланишича, машина ичида икки киши бўлган — улар Ўзбекистон фуқароларидир. 1996 йилда туғилган фуқаро маст ҳолатда бўлган. Бунинг устига суриштирув давомида автомобиль ўғирлангани ҳам аниқланган.
Ҳолат юзасидан Қозоғистон Жиноят кодексининг тегишли моддалари билан ҳозирда судга қадар тергов ҳаракатлари олиб борилмоқда. Мамлакат қонунчилигига мувофиқ, бундай ҳуқуқбузарлик содир этган шахслар 5 йилгача озодликдан маҳрум этилиши мумкин.
Август охирларида Қозоғистонда ўзбекистонлик ҳайдовчи бошқарувидаги фура енгил автомобиль билан тўқнашганди. Оқибатда бир киши ҳалок бўлган, бир киши эса касалхонага ётқизилган эди.
Изоҳ (0)