“Реал” 5 та гол урилган ўйинда “Барселона”ни йирик ҳисобда мағлуб этди ва Испания Суперкубоги ғолибига айланди

Футбол бўйича Испания Суперкубоги финалида “Реал” ва “Барселона” 14 январь, якшанба куни ўзаро кураш олиб борди.

Учрашув мадридликларнинг тотал устунлигида бошланди ва жамоа тезкор гол урди. 7-дақиқада Винисиус Жуниор ҳисобни очди. Орадан 3 дақиқа ўтиб, бразилиялик футболчи дублни расмийлаштирди. 33-дақиқада каталонияликлар ҳисобни қисқартиришга муваффақ бўлди. Кетма-кет ҳужумлардан сўнг тўп Роберт Левандовскига бориб тушди ва полшалик ҳужумчи ажойиб зарба билан дарвозани ишғол этди. 39-дақиқада эса ўзи ишлаб олган пенальтини аниқ амалга ошириб, ҳет-трик муаллифига айланди. Биринчи бўлим 3:1 ҳисобида якунланди.

Иккинчи бўлимда жамоалар темпни бир оз пасайтирди. Лекин 64-дақиқага келиб, ҳисоб ўзгарди. “Қаймоқранглилар”нинг комбинацион ҳужуми Родригонинг голи билан якунланди. “Барселона” учун “ёмон хабарлар” ҳали тугамаган эди. 71-дақиқада Роналд Араухо Винисиусга ишлатилган қўполлик учун иккинчи сариқ карточкани олди ва майдондан четлатилди. Қолган дақиқаларда дарвозалар ишғол этилмади ва ўйин 4:1 ҳисобида “Реал”нинг фойдасига якунланди.

Шу тариқа мадридликлар ўз тарихида 13 марта Испания Суперкубоги соҳибига айланди.

Испания Суперкубоги

Финал

14 январь, якшанба

“Реал” — “Барселона” 4:1

Голлар: 1:0 – 7 Винисиус Жуниор, 2:0 – 10 Винисиус Жуниор, 2:1 – 33 Левандовски, 3:1 – 39 Винисиус Жуниор (пенальти), 4:1 – 64 Родриго.

“Реал Мадрид”: Лунин, Карвахаль, Начо, Рюдигер, Менди, Кроос (Модрич, 81), Вальверде (Себальос, 86), Тчуамени, Беллингҳем (Хоселу, 86), Винисиус Жуниор (Камавинга, 82), Родриго (Браим Диас, 77).

“Барселона”: Пеня, Араухо, Кристенсен, Кунде, Балде, Сержи Роберто (Лопес, 61), Гундўған, де Йонг, Педри (Ямал, 61), Ферран Торрес (Жоау Феликс, 61), Левандовски.

Огоҳлантиришлар: Араухо (37), Сержи Роберто (40), Беллингҳем (43), Рюдигер (62).

Четлатиш: Араухо (71).