“Реал Мадрид” 8 та гол урилган ўйинда “Атлетико”ни мағлуб этиб, Испания Суперкубоги финалига йўл олди

Футбол бўйича Испания Суперкубогининг ярим финалида “Реал” ва “Атлетико” жамоалари 10 январь, чоршанба куни баҳс олиб борди.

Учрашувнинг 7-дақиқасида “матрасчилар” футболчиси Марио Эрмосо ҳисобни очди. 20-дақиқада Антонио Рюдигер ҳисобни тенглаштирди. 29-дақиқада эса Ферлан Менди ажойиб гол уриб, “қаймоқранглилар”ни ҳисобда олдинга олиб чиқди. 37-дақиқада Антуан Гризманн мувозанатни тиклади.

Иккинчи бўлимда ҳам жамоалар ҳужумкор ўйин намойиш этди. 78-дақиқага келиб, мухлислар яна бир гол кўрди. Рюдигер бу сафар ўз дарвозасини ишғол қилиб қўйди. 85-дақиқада эса қироллик клубининг кетма-кет ҳужумларидан сўнг Дани Карвахаль ўйиндаги олтинчи голга муаллифлик қилди.

Асосий бўлимларда дуранг натижа қайд этилгач, жамоалар қўшимча бўлимларга мурожаат қилди.

Қўшимча бўлимларда ҳам иккала клуб драматик ўйин намойиш этди. 116-дақиқада Стефан Савич автогол муаллифига айланган бўлса, ўйин якунида Браим Диас бўш қолган дарвозага тўпни йўналтириб, жамоасининг ишончли ғалабасини таъминлади.

Шу тариқа 5:3 ҳисобида ғалаба қозонган Карло Анчелотти жамоаси финалга йўл олди. Иккинчи ярим финалда “Барселона” ва “Осасуна” ўзаро кураш олиб боради.

Испания Суперкубоги

Ярим финал баҳси

10 январь, чоршанба

“Реал” — “Атлетико” 5:3

Голлар: 0:1 – 6 Эрмосо, 1:1 – 20 Рюдигер, 2:1 – 29 Менди, 2:2 – 37 Гризманн, 2:3 – 78 Рюдигер (автогол), 3:3 – 85 Карвахаль, 4:3 – 116 Савич (автогол), 5:3 – 120 Браим Диас.

“Реал Мадрид”: Аррисабалага, Карвахаль, Начо, Рюдигер, Менди (Камавинга, 81), Модрич (Кроос, 67), Вальверде (Гюлер, 112), Тчуамени (Браим Диас, 81), Беллингҳем, Винисиус Жуниор (Хоселу, 105), Родриго (Себальос, 105).

“Атлетико”: Облак, Савич, Хименес, Эрмосо, Льоренте (Аспиликуэта, 105), Коке (Галан, 104), Сауль (Молина, 67), Де Пол (Витцель, 90), Гризманн, Мората (Корреа, 90), Лино (Рикельме, 67).

Огоҳлантириш: Браим Диас (120).